WAFUGAJI WATAKIWA KUHESHIMU NA KULINDA MASHAMBA YA WAKULIMA

Posted on: April 3rd, 2024

Mkuu wa Wilaya ya Siha Mhe Dkt Christopher Timbuka amewataka wafugaji kulinda na kuheshimu mashamba ya wakulima ili kuepusha migogoro ya wafugaji na wakulima katika Wilaya.

Mhe Dkt Timbuka amesema hayo leo Aprili 03, 2024 wakati wa kikao kazi na viongozi wa wafugaji na wakulima katika Wilaya ya Siha kilichofanyika katika ukumbi wa makao makuu ya Halmashauri kwa lengo la kusikiliza na kutatua changamoto zilizopo baina ya wafugaji na wakulima.

Amesema ili viongozi wasichukue hatua za kisheria za kutaifisha mifugo itakayobainika kuvuruga mazao katika mashamba ya wakulima ni vyema wafugaji waheshimu na kuwa sehemu ya ulinzi wa mazao ya wakulima.

Baadhi ya wafugaji na wakulima wakiwa kwenye kikao kazi na Mkuu wa Wilaya ya Siha kilichofanyika leo Aprili 03, 2024 katika ukumbi wa makao makuu ya Halmashauri kwa lengo la kusikiliza na kutatua changamoto zilizopo baina ya wafugaji na wakulima.

“Nisingependa kuchukua hizi hatua za kisheria lakini itakapobidi tutafanya hivyo kwa sababu ng’ombe wakikamatwa wameharibu mazao hatuna kingine cha kufanya, itabidi hatua za kisheria zichukuliwe ili kufidia uharibifu uliosababishwa na mifugo husika” amesema Mhe Dkt Timbuka.

“Ili kuzuia hatua hizo za kisheria za kutaifishwa mifugo yako, wafugaji msipeleke mifugo yenu kwenye mashamba ya watu kwa sababu ikitokea hata mimi ndicho nitakachofanya kwani hilo ni takwa la kisheria” ameongeza Mhe. Dkt Timbuka.