Wafanyabiashara Wilayani Siha watakiwa kuzingatia usafi

Posted on: June 5th, 2023

Mkuu wa Wilaya ya Siha Dkt Christopher Timbuka amewataka viongozi wa soko na kata ya Sanya Juu Kuimarisha Usafi wa soko la sanya juu kwa kushirikiana na kutimiza wajibu wao kwa kuhakikisha soko hilo linakuwa safi wakati wote.

Agizo hilo amelitoa leo tarehe 5/6/2023 akiwa katika maadhimisho ya siku ya mazingira duniani yaliyoadhimishwa Kiwilaya katika soko la Sanya Juu lililopo Kijiji cha Sanya Juu kata ya Sanya Juu.

Akiwa katika Soko la Sanya Juu amewaagiza viongozi hao kusimamia wafanyabiashara kuwa na vyombo vya kuwekea taka ili kupunguza kuzagaa kwa uchafu sokoni hapo.

Pia Mkuu wa Wilaya ya Siha amewataka viongozi wa soko la Sanya Juu kutoa  elimu  kwa wafanya biashara wa vyakula wanao elekeza maji taka barabarani kuacha tabia hiyo  mara moja kwani kufanya hivyo ni kinyume cha sheria.

“Natoa agizo kwa wafanyabiashara wanaozunguka soko la Sanya Juu kila mmoja ahakikishe anafanya usafi katika eneo lake la biashara ili kuvutia wateja wengi zaidi kufika soko la Sanya na kununua bidhaa mbalimbali” alisema Dkt. Timbuka

Dkt Christopher Timbuka amewashukuru viongozi wa Kata ya Sanya Juu kushirikiana na uongozi wa soko hilo ili kufanya soko la Sanya kuwa soko la kisasa na la kila siku badala ya ilivyo sasa ambalo linafanyika wiki mara mbili tu.

“Natoa agizo kwa viongozi wa soko kuhakikisha kuwa soko linafungwa kwa muda unaokubalika badala ya kufanya biashara hadi usiku ambapo kuna watu wanachafua soko kwa kutupa taka nyakati za giza”alisema na kuongeza Dkt. Timbuka. Kauli mbiu ya siku ya mazingira “Pinga uchafuzi wa mazingira unaotokana na taka za plastiki”