Wafanyabiashara Siha Watakiwa kutumia Mizani

Posted on: September 12th, 2023

WAFANYA BIASHARA WILAYA YA SIHA WATAKIWA KUTUMIA VIPIMO VINAVYOKUBALIKA.Mkuu wa Wilaya ya Siha Dkt. Christopher Timbuka amewataka Wafanyabiashara katika Wilaya ya Siha kuendelea kushirikiana katika utoaji wa elimu ya matumizi sahihi vipimo na mfumo mpya wa Serikali wa TAUSI unaowawezesha kupata huduma za Serikali bila kutumia gharama za  kufika ofisini za Halmashauri.

Dkt. Timbuka amesema hayo leo Septemba 12, 2023 katika Kikao cha Baraza la Biashara la Wilaya ya Siha kilichofanyika katika Ukumbi wa Mikutano wa Makao Makuu ya Halmashauri ya Wilaya ya Siha ambapo amesema lengo la utoaji wa elimu hiyo ni kupunguza kero na kurahisisha ufanyaji wa biashara katika Wilaya ya Siha.

Amewataka wafanya biashara kutumia fursa za uwekezaji zilizopo katika Wilaya ya Siha ili kukuza kipato cha wananchi na Serikali kwa ujumla.

Aidha,ameeleza kuwa  Serikali  kwa upande wake itaendelea kushughulikia changamoto zinazoibuka kwenye sekta ya biashara ili wananchi wafanye biashara bila kikwazo.

“Naomba tushirikiane kwenye maeneo ambayo tumekubaliana kwamba tutasaidiana katika utoaji wa elimu kwa jamii katika maeneo mbalimbali  ikiwa ni yale ya kibiashara na yasiyokuwa ya kibiashara mfano elimu ya vipimo vilivyoruhusiwa na Serikali kupima mazao kwa kutumia mizani ili tusiwadhulumu wakulima wetu” amesema Dkt. Timbuka.

Kwa upande wake, Mkurugenzi Mtendaji wa Halmashauri ya Wilaya ya Siha Dkt Haji Mnasi amesema Wilaya ya Siha inazo fursa nyingi za uwekezaji kwenye Sekta ya Utalii, Kilimo na Biashara hivyo wananchi na wafanyabiashara wanatakiwa kuzichangamkia.

Akizungumzia Uboreshaji wa Shughuli za kilimo cha Umwagiliaji, Afisa Kilimo wa Halmashauri ya Wilaya ya Siha Habibu Ally amesema kwa mwaka wa fedha 2023/2024 Serikali imepanga kuchimba visima 150 vitakavyowawezesha wananchi kufanya kilimo cha umwagiliaji hali itakayochochea biashara ya mazao ya kilimo katika Wilaya ya Siha.

Nao, Baadhi ya Wafanya Biashara wameishauri Serikali Wilaya ya Siha kupitia Kitengo cha Biashara na Divisheni ya Kilimo, Umwagiliaji na Ushirika kuendelea kutoa elimu kwa wananchi kutumia mizani kupima mazao yao wakati wa kuuza na kuimarisha mahusiano mema baina ya Wafanya Biashara ya Serikali.