Viongozi wa Dini,Mila Wilayani Siha wasema wananchi wapo tayari kuhesabiwa tarehe 23 Agosti,2022

Posted on: August 20th, 2022

Viongozi wa Madhehebu ya Dini Wazee Maarufu pamoja na Viongozi wa Kimila katika Wilaya ya Siha Mkoa wa Kilimanjaro wamewataka na kuwaomba wananchi na wakazi wa Wilaya ya Siha kushiriki kuhesabiwa katika zoezi la sensa ya watu na makazi inayotarajiwa kufanyika siku ya Jumanne tarehe 23 Agosti,2022.

Mkuu wa Wilaya ya Siha mhe. Thomas Apson akiongea na Viongozi wa dini na Mila katika ukumbi wa Halmashauri ya Siha

Kauli hiyo imetolewa na Viongozi hao  katika kikao cha pamoja kilichoitishwa na mhe. Mkuu wa Wilaya ya Siha leo tarehe 20.8.2022 na kufanyika katika ukumbi wa mikutano wa Halmashauri ya Siha kwa lengo la kufanikisha zoezi la sensa  ya watu na makazi pamoja na zoezi la utoaji wa chanjo ya uviko 19 . 

Awali akifungua kikao hicho muhimu,Mkuu wa Wilaya ya Siha mhe. Thomas Apson aliwashukuru Viongozi wa Madhehebu ya Dini Wilayani Siha pamoja na Viongozi wa Kimila (Malaigwanan na Mangi) kwa jinsi wanavyosaidiana na Serikali ya Rais Samia Suluhu Hassan katika kuboresha utoaji wa huduma bora kwa jamii.

 Viongozi wa Dini wakiwa katika ukumbi wa mikutano wa Halmashauri ya Siha leo tarehe 20.8.2022

Napenda kuwapongeza na kuwashukuru sana viongozi wangu kwa jinsi mnavyoendelea kuwaelimisha wananchi kuhusu umuhimu  kupata chanjo ya kujilinda na ugonjwa hatari wa corona kwani ugonjwa huu bado unaendelea kuwa tishio kwa maisha ya Wanadamu hapa duniani alisema mhe. Thomas Apson Mkuu wa Wilaya ya Siha.

Aliwashukuru pia Viongozi madhehebu ya Dini,Wazee Maarufu pamoja na Viongozi wa Kimila katika Wilaya ya Siha kwa jinsi wanavyoendelea kutoa elimu kwa wananchi kuhusu umuhimu wa sensa kwa maendeleo yao,Wilaya na Taifa kwa ujumla.

Akizungumza katika kikao hicho Kiongozi wa Kabila la Kimaasai  Tanzania na Kenya Laigwanan Joseph Laizer ambaye pia ni mkazi wa Wilaya ya Siha alimwakikishia mkuu wa Wilaya ya Siha kuwa kwa upande wa kabila la kimaasai wapo tayari kuhesabiwa na wanasubiri tu tarehe 23 agosti,2022 ili wahesabiwe.

Napenda kukuhakikishia kuwa sisi wafugaji kabila la Kimaasai tumepata elimu ya kutosha kutoka Serikalini kupitia Viongozi wake pamoja na vyombo vya habari tumeelewa na tupo tayari kuhesabiwa kwani sensa ndiyo maendeleo yetu alisema Laigwanan Joseph Laizer.

Naye Mangi Mkuu wa Wilaya ya Siha ndugu Johnson Kileo alisema kuwa kwa upande wake ameshakutana na koo zote za Wilaya ya Siha na kuweka utaratibu wa kuendelea kutoa elimu kwa kila kaya kuhakikisha kuwa wanashiriki vema kuhesabiwa ili serikali ipate takwimu sahihi zitakazosaidia kupanga mipango ya maendeleo kwa wananchi wake.

Mkuu wa Wilaya ya Siha mhe. Thomas Apson (wa sita kutoka kushoto mbele) akiwa na viongozi wa dini na viongozi wa Kimila leo tarehe 20.8.2022 makao makuu ya Halmashauri ya Siha

Katika Kikao hicho cha Mkuu wa Wilaya ya Siha Viongozi mbalimbali walihudhuria wakiwemo Mkurugenzi Mtendaji wa Halmashauri ya Siha,Wajumbe wa Kamati ya ulinzi ya Wilaya ya Siha, Kaimu Afisa Tawala wa Wilaya ya Siha,Wazee maarufu Siha,Viongozi wa Madhehebu ya Dini na Viongozi wa Kimila Wilaya ya Siha