Viongozi wa Dini Wilayani Siha wahimiza Maadili katika Jamii

Posted on: July 27th, 2023

Kilio cha Viongozi wa Dini dhidi ya mmomonyoko wa Maadili

Viongozi wa Madhehebu ya Dini Wilaya ya Siha Mkoa wa Kilimanjaro wametoa wito kwa viongozi wa Serikali kuendelea kushirikiana na viongozi wa dini katika mapambano dhidi ya janga kubwa la mmomonyoko wa maadili katika jamii.

Kauli hiyo imetolewa na Viongozi hao katika maadhimisho ya kumbukizi ya siku ya mashujaa waliopigania nchi yetu, ambayo katika Wilaya ya Siha yamefanyika tarehe 25/7/2023 katika Kata ya Sanya Juu.

Akiongea katika maadhimisho hayo Mchungaji Mwenza wa Kanisa la Kiinjili la Kilutheri Tanzania Usharika wa Sanya Juu Mchungaji Regium Kimaro alisema kuwa jamii ya Watanzania hususani vijana wamepoteza mwelekeo kwa kufanya mambo ya kuiga kutoka Nchi za Ulaya na Marekani.

“Naomba Watanzania tuige mambo mazuri na tuache kuiga mambo mabaya ambayo hayaendani na mila na tamaduni za Mwafrika mfano mambo ya mapenzi ya jinsia moja pamoja na matumizi ya madawa ya kuleya” alisema na kuongeza mchungaji Kimaro.

Mchungaji Kimaro alisema ipo haja ya kujitathmini kwa kuangalia tulipotoka, tulipo na tunapoenda na ni jukumu la watanzania wote wakiwemo viongozi wa Serikali,viongozi  wa dini, wafanyakazi, wazazi /Walezi na jamii yote ya Tanzania kutokomeza vitendo vinavyochangia mmomonyoko wa maadili.

Naye Kiongozi wa Dini ya Kiislam Wilaya ya Siha Imamu Mohamed Hassan alisema kuwa wazazi na walezi wanalo jukumu kubwa la kuhakikisha kuwa watoto wanalelewa vizuri ili wasijiingize katika matendo maovu ikiwemo zinaa,ulevi na wizi.

Alieleza kuwa kwa hivi sasa vijana wengi wameiga tamaduni kutoka nje ya nchi na wengine wanatembea wakiwa wamevaa mavazi yanayoonyesha sehemu kubwa ya maungo ya miili yao.

Imamu Mohamed alisema Viongozi wa Serikali kwa kushirikiana na Viongozi wa Dini na jamii kwa ujumla wanaweza kushirikiana kutengeneza mbinu za kukabiliana na mmomonyoko wa maadili kwani bila kufanya hivyo kutachangia kutengeneza kizazi kisichokuwa na maadili bora ya Kitanzania.