Vifaa Tiba Shilingi Milioni 80 vyapokelewa Hospitali ya Wilaya

Posted on: September 5th, 2023

 VIFAA TIBA SHILINGI MILIONI 80 VYAPOKEWA HOSPITAL YA WILAYA 

Naibu Waziri wa Afya na Mbunge wa Jimbo la Siha Mhe. Dkt Godwin Mollel amezishukuru Taasisi za Kimataifa ya Rotary 1918 Winndsor Canada na Taasisi ya PANETA baada ya kukabidhi Ultrasound na vifaa tiba vingine vyenye thamani ya zaidi ya Shilingi milioni 80 katika Hospitali ya Wilaya ya Siha.

Naibu Waziri Mhe Dkt. mollel amesema hayo Septemba 03, 2023 katika hafla ya kumkabidhi Mkuu wa Wilaya ya Siha Mhe. Dkt Christopher Timbuka vifaa tiba hivyo,hafla  iliyofanyika kwenye Hospitali ya Wilaya ya Siha ambapo amesema lengo la kukabidhi vifaa tiba katika Hospitali hiyo ni kuongeza ufanisi na ubora wa huduma zinazotolewa kwa mama na mtoto.

Amesema Serikali imelipa kipaumbele eneo la afya ya mama na mtoto ili kuhakikisha vifo vya mama na mtoto nchini vinapungua au kumalizika kabisa.

“Tumekuwa tukiomba wadau na washirika wetu wa maendeleo watusaidie vifaa tiba katika maeneo mbalimbali  hapa nchini na kipaumbele kwenye eneo la afya ya mama na mtoto na Mhe. Rais wetu, anataka kupunguza/kumaliza  vifo vya mama na mtoto nchini” amesema Naibu Waziri Dkt Mollel

Naye, Mkuu wa Wilaya ya Siha Mhe Dkt. Christopher Timbuka akipokea viaa hivyo ,amesema kuwa vifaa vilivyopokewa vitasaidia kurahisisha matibabu kwa wanawake zaidi ya 350 ndani ya Wilaya na wengine zaidi ya 80 kutoka nje ya Wilaya wanaohudumia kila mwezi katika Hospitali ya Wilaya ya Siha.

Amesema vifaa tiba hivyo vitatumika kwa lengo lililokusudiwa la kuwahudumia wananchi wanaofika kutibiwa katika Hospitali ya Wilaya hali itakayosaidia kupunguza gharama za kufuata huduma katika maeneo mengine nje ya Wilaya.

“Na sisi tutahakikisha kuwa tunavitunza ili viweze kuwahudumia watu wengi zaidi na watu waone manufaa ya vifaa hivi, na tunaishukuru sana Diplomasia ya Mhe. Rais wa Jamhuri ya Muungano wa Tanzania kwa sababu ndiyo inayotufanya tunakubalika kwa watu katika maeneo mbalimbali duniani” ameongeza Mhe. Dkt Timbuka.

Kwa upande wake, Mwakilishi wa Taasisi ya Kimataifa ya Rotary 1918 Winndsor kutoka nchini Canada Daktari Mkunga Andrea Cassidy amesema lengo la kutoa vifaa hivyo ni kuhakikisha huduma bora na salama kwa mama na mtoto inapatikana bila kujali eneo alilopo mwananchi na wataendeleo kutoa mafunzo ya namna ya kutumia vifaa hivyo kwa Wataalamu wa Afya katika Hospitali ya Wilaya ya Siha.

Hospitali ya Wilaya ya Siha imepokea “Ultrasound” na vifaa tiba vyenye thamani ya zaidi ya Milioni 80 kutoka taasisi ya Kimataifa ya Rotary 1918 Winndsor Canada na Taasisi ya PANETA kwa uratibu uliofanywa na Serikali kupitia Wizara ya Afya ili kuboresha zaidi huduma za mama na mtoto katika Hospitali hiyo.