Tuwahamasishe Wananchi Wajitokeze Kuboresha Taarifa kwenye Daftari la Mpiga Kura - Dkt Mnasi

Posted on: August 26th, 2024

Mkurugenzi Mtendaji wa Halmashauri ya Wilaya ya Siha amewahimiza Wah. madiwani kwa kushirikiana na watendaji wa kata na vijiji kuwahamasisha wananchi kujitokeza kwa wingi kuboresha taarifa zao katika daftari la mpiga kura.

Akizungumza leo Agosti 26, 2024 kwenye kikao cha baraza la waheshimiwa madiwani la kujadili taarifa ya hesabu za mwisho wa mwaka wa fedha ulioishia tarehe 30 Juni 2024 kilichofanyika katika ukumbi wa Makao Makuu ya Halmashauri, Dkt Haji Mnasi amesema wananchi wakijiandikisha na kuboresha taarifa zao kwenye daftari la kudumu la mpiga kura litamwezesha kuchagua viongozi wanaowahitaji.

Amesema zoezi la uandikishaji na uboreshaji wa taarifa kwenye daftari la mpiga kura litaanza siku chachge zijazo katika mkoa wa Kilimanjaro, hivyo wananchi wajitokeze kwa wingi.

"Tunaendelea kufanya maandalizi wa uboreshaji wa daftari la kudumu la mpiga kura mwezi septemba na uchaguzi wa serikali za mitaa tarehe 27 Novemba 2024 kama ambavyo Waziri mwenye dhamana alitangaza kwa hiyo ipo haja sasa ya kuendelea kuwahamasisha wananchi katika maeneo tunayoyaongoza wajiandikishe na kuboresha taarifa zao ili wapate haki yao ya msingi ya kupiga kura" Amesema Dkt Mnasi.

Kikao cha Baraza la Waheshimiwa Madiwani la kujadili taarifa ya hesabu za mwisho wa mwaka wa fedha ulioishia tarehe 30 Juni 2024 ni utekelezaji wa agizo namba 31 (1) la memoranda ya fedha ya Mamlaka ya Serikali za Mitaa ya mwaka 2009 inayomtaka Afisa Masuhuli kuandaa na kuwasilisha Hesabu za mwisho kwa Kamati ya Fedha, Uongozi na Mipango, Baraza la Madiwani hatimaye kwa Mkaguzi na Mdhibiti Mkuu wa Hesabu za Serikali.