TUFUATE MISINGI YA UADILIFU NA UWAJIBIKAJI - DKT TIMBUKA

Posted on: August 19th, 2025

Mkuu wa Wilaya ya Siha Mhe. Dkt Christopher Timbuka amesihi viongozi wapya wa bodi ya maji ya Lawate – Fuka waliochaguliwa kufuata misingi ya uadilifu na uwajibikaji ili kutatua kero na malalamiko ya wananchi katika kata zote tisa zinazohudumiwa na bodi hiyo.

Mhe. Dkt Timbuka ametoa rai hiyo leo Agosti 19, 2025 kwenye Mkutano wa  uchaguzi wa viongozi wa bodi ya maji ya Lawate – Fuka uliofanyika katika ukumbi wa RC – Sanya Juu amabpo amewahimiza kufanya kazi kama timu moja ili wananchi wanaohudimiwa na bodi hiyo wapate huduma ya maji.

Amewasihi viongozi wote kushirikiana na kuwa wafuatiliaji ili kubaini sababu zinazochangia kukatika kwa maji na kuwafahamisha wananchi.

“Niwaombe tukatatue kero za wananchi kwenye bodi zetu za maji ikiwemo mambo ya kubambikia bili na maji kukatika bila taarifa kwa kuongeza uwazi na kutengeneza makundi sogozi yatakayosaidia kufikisha taarifa kwa wananchi” amesema Mhe. Dkt Timbuka.

Amewaelekeza viongozi wa bodi waliochaguliwa kushirikiana wa wakala wa maji safi na usafi wa mazingira Wilaya (RUWASA), wenyeviti wa vijiji na watendaji wa kata na vijiji kubaini na kuzishughulikia changamoto au kero zinazoibuliwa na wananchi kwa wakati.

Naye, Mwenyekiti mpya wa bodi ya maji ya Lawate - Fuka Ndg. Nicholas Kombe amewashukuru wajumbe wa bodi kwa kumchagua na kuwaomba waendeleze ushirikiano ili kuwatumikia wananchi.