TOENI USHIRIKIANO KUWEZESHA UWEKAJI MIPAKA YA VIJIJI - Dkt TIMBUKA DC SIHA

Posted on: June 7th, 2024

Mkuu wa Wilaya ya Siha mhe dkt Christopher Timbuka amewazitaka halmashauri za vijiji sita vya Tarafa ya Siha Kusini kutoa ushirikiano kwa Maafisa Ardhi Mkoa na Wilaya wanaopima na kurasimisha mipaka ya vijiji ili kuviwezesha kutambua mipaka na kupanga matumizi bora ya ardhi.

Mhe Dkt Christopher Timbuka ametoa wito huo Juni 06, 2024 wakati wa kikao kazi na Halmashauri ya Vijiji Sita (6) vya Tarafa ya Siha Kusini kilichofanyika katika Shule ya Awali na Msingi Munge chenye lengo la kutoa elimu ya kubainisha na kupima mikapa ya vijiji ili kuviwezesha kuwa na ramani zinazoonesha maeneo ya vijiji.

Amesema ubainishaji na upimaji wa mipaka ya vijiji ukikamilika utaviwezesha vijiji kupata vyeti vya ardhi vitakavyowezesha serikali za vijiji kutoa hati za kimila kwa wananchi wanaomiliki ardhi na kupanga matumizi bora ya ardhi.

“Hii itasaidia sana katika kupunguza migogoro baina ya kijiji na kijiji kwani vijiji sasa vitapata ramani zinazoonesha mipaka ya vijiji na wataweza kuyasimamia vizuri maeneo yao na kufanya maendelezo kwa kupanga matumizi bora ya ardhi ndani ya kijiji” amesema Mhe Dkt Christopher Timbuka.

“Hii ni hatua ya kwanza kuelekea katika hatua ya pili ambapo sasa vijiji vitapatiwa vyeti vya ardhi vitakavyowezesha Halamashauri za vijiji kutoa hati za kimila kwa ajili ya umiliki ya ardhi kwa wananchi wenye ardhi, na zoezi hili linaanza rasmi juni 07, 2024 katika kijiji cha Munge na kuendelea katika maeneo mengine ya tarafa ya siha kusini” ameongeza Mhe Dkt Timbuka.

Kikao hicho kilihudhuriwa na Maafisa Ardhi wa Mkoa wa Kilimanjaro, Mwakilishi wa Kamishna wa Ardhi Mkoa, Mtekelezaji wa maelekezo ya baraza la mawaziri Mkoa, Kaimu Mkurugenzi Mtendaji wa Halmashauri ya Wilaya ya Siha, Maafisa Ardhi Wilaya, Watendaji wa Vijiji, Wenyeviti na Wajumbe wa Halmashauri za Vijiji.