Siha yavuka lengo uandikisha darasa la kwanza 2019

Posted on: February 27th, 2019

Wanafunzi 3,371 waandikishwa Darasa la kwanza Siha 2019

Halmashauri ya Wilaya ya Siha Mkoa wa Kilimanjaro imevuka lengo la uandikishaji darasa la kwanza kwa mwaka 2019 ambapo zaidi ya wanafunzi 3371 wameandikishwa hadi kufikia mwezi Februari,2019.

Hayo yamesemwa na Mwenyekiti wa Halmashauri ya Siha mhe. Godson Ngomuo alipokuwa akitoa taarifa yake ya robo ya pili ya mwaka katika mkutano wa kawaida wa baraza la Wah. Madiwani wa Halmashauri ya Siha. Mkutano huo umekutana kwa muda wa siku mbili tarehe 26/2/2019 na 27/2/2019 katika ukumbi wa mikutano wa Halmashauri ya Siha.

Katika taarifa yake kwa Baraza la Wah. Madiwani Mwenyekiti huyo alieleza kuwa lengo la Halmashauri ni kuandikisha watoto 2,225 wa darasa la awali ambapo hadi kufikia mwezi wa Februari,2019 jumla ya watoto 2848 sawa na asilimia 116 walikuwa wamekwisha andikishwa katika shule zote za msingi Wilaya ya Siha.

Napenda kuwaeleza kuwa uandikishaji wa wanafunzi wa darasa la kwanza hadi kufikia mwezi Februari, 2019 umefikia jumla ya watoto 3371 sawa na asilimia 114. Haya ni mafanikio makubwa sana kwa  Halmashauri yetu ya Wilaya  ya Siha alisema Ngomuo.

Halmashauri ya Wilaya ya Siha inajumla ya shule 53 za msingi za Serikali na shule 7 za zinazomilikiwa na taasisi za Dini pamoja na watu binafsi.