Siha yakusanya mapato zaidi ya asilimia 100

Posted on: July 3rd, 2024

Mwenyekiti wa Halmashauri ya Siha Mhe Duncan Urassa amempongeza Mkuu wa Wilaya Ya Siha Mhe Dkt Chritopher Timbuka na Mkurugenzi Mtendaji Dkt Haji Mnasi usimamizi mzuri wa ukusanyaji wa mapato ya ndani na wanavyoshirkiana kuwahudumia wananchi.

Mkurugenzi Mtendaji Halmashauri ya Siha Dkt. Haji Mnasi

Mwenyekiti Urassa ametoa pongezi  hizo wakati  akifunga kikao cha baraza maalumu la madiwani la kupitia hoja za mkaguzi mkuu wa hesabu za serikali (CAG) lililofanyika katika ukumbi wa mikutano wa makao makuu ya halmashauri.

Mhe. Urassa amesema ushirikiano uliopo kati ya ofisi ya Mkurugenzi Mtendaji na Ofisi ya Mkuu wa Wilaya ya Siha umechangia kwa kiasi kikubwa kukusanya mapato ya ndani kwa asilimia zaidi ya 100.

Katika hatua nyingine amempongeza Mkurugenzi Mtendaji Dkt Haji Mnasi anavyoshirikiana na Menejimenti kujadili na kuzitolea majibu hoja za mdhibiti na mkaguzi mkuu wa hesabu za Serikali – CAG hali iliwezesha halmashauri kupata hati safi kwa miaka mitatu mfululizo.

“Nichukue fursa hii kumpongeza Mkurugenzi mtendaji kwa namna anavyopambana na menejimenti kuhakikisha anaweka mikakati mizuri ya ukusanyaji  wa mapato na kwa sasa Halmashauri imefanikiwa kukusanya zaidi ya asilimia 100 kwa mwaka wa fedha 2023/2024” amesema Mhe. Duncan Urassa.

Mwenyekiti wa Halmashauri ya Siha Mhe Duncan Urassa ameongeza kuwa watahakikisha taasisi zote za serikali ndani ya Halmashauri ya Siha zinapata hati miliki ili kuendelea kulinda maeneo yasivamiwe na wananchi.