SIHA YAADHIMISHA SIKU YA LISHE KWA KUTOA ELIMU KWA WANANCHI WA GARARAGUA

Posted on: October 30th, 2024

Wilaya ya Siha imeadhimisha Siku ya Lishe leo Oktoba 30, 2024 kwa kutoa elimu ya lishe (Makundi ya chakula na matumizi yake wakati wa uandaaji wa chakula), afya ya mama na mtoto na usalama wa chakula kwa wananchi wa Kijiji cha Magadini Kata ya Gararagua.

Akizungumza wakati wa ufunguzi wa maadhimisho ya siku ya lishe yaliyoyanyika katika Kanisa la Kiinjili la Kilutheri Tanzania - KKKT, Usharika wa Wiri, Mkuu wa Wilaya ya Siha Mhe. Dkt Christopher Timbuka amewahimiza wananchi kuwapa lishe bora watoto ili kupunguza au kuondoa hali ya udumavu kwa watoto unaosababishwa na ukosefu wa lishe bora.

Amesema takwimu za kitaifa zinaonesha asilimia 30 ya watoto wana tatizo la udumavu, hivyo wananchi wanatakiwa kuboresha hali ya lishe kwa watoto kuanzia wakati wa ujauzito hadi wanapotimiza umri wa miaka mitano.

Amesema wananchi wakiboresha lishe ya watoto, wanawake wajawazito na jamii kwa ujumla itasaidia kuimarisha afya na kuondokana na changamoto ya udumavu.

"Matumaini yangu ni kwamba wote mliofika hapa mtatumia elimu mliopata hapa na kuboresha hali ya afya na lishe katika maeneo yenu, ili hatimaye tuwe na Wilaya yenye watoto wenye afya njema watakaotekeleza majukumu yao ya kila siku" amesema Mkuu wa Wilaya ya Siha Mhe. Dkt Christopher Timbuka.

Maadhimisho ya siku la lishe kitaifa yanaongozwa na kaulimbiu isemayo, "Mchongo ni Afya Yako, Zingatia Unachokula"

Elimu ya Lishe, Afya ya Mama na Mtoto na Usalama wa chakula ikitolewa kwa wananchi katika maadhimisho ya siku ya lishe yaliyofanyika kwenye Kanisa la Kiinjili la Kilutheri Tanzania - KKKT, Usharika wa Wiri leo Oktoba 30, 2024.