SIHA YAADHIMISHA JUMA LA ELIMU YA WATU WAZIMA

Posted on: September 27th, 2024

Katibu Tawala wa Wilaya ya Siha Jane Chalamila amesema elimu ya watu wazima na elimu nje ya mfumo rasmi umeleta manufaa makubwa kwa walengwa kupitia programu mbalimbali, ikiwa ni Pamoja na Mpango wa Elimu Msingi kwa walioikosa (MEMKWA) na Mpango wa uwiano kati ya elimu na jamii (MKEJA).

Katibu Tawala Chalamila amesema hayo leo septemba 27, 2024 katika kilele cha maadhimisho ya juma la elimu ya watu wazima Wilaya ya Siha yaliyofanyika katika kituo cha walimu Sanya Juu ambapo amesema elimu hiyo imewawezesha walengwa kupata mafunzo ya ufundi na utaalamu wa aina mbalimbali ikiwemo kilimo, ufugaji, masuala ya umeme, upishi, ushonaji, usindikaji vyakula, utengenezaji wa sabuni, ususi, mapambo na vifaa vingine tumizi.

Amesema ujuzi wanaojengewa walengwa wa elimu ya watu wazima unawawezesha kuanzisha shughuli mbalimbali za kijasiriamali hali inayowapa faida za kiuchumi na kijamii kupitia kazi zao zinazoonekana bayana.

Katibu Tawala Chalamila amewashukuru wadau wa maendeleo na wataalamu wanaotoa elimu pamoja na uwezeshaji kwa wanafunzi na vikundi lengwa katika mpango huu wa kupata elimu nje ya mfumo rasmi.

Aidha, amewaasa wadau wa elimu kuendelea kusimamia kwa umakini programu zilizopo kwa lengo la kupanua wigo wa maendeleo ya Wilaya ya Siha na Taifa kwa ujumla.

"Wananchi wote wasiojua kusoma na kuandika tunawahamasisha kujitokeza na kujiandikisha kwenye vituo vya elimu ya watu wazima ili mupate kuelimika na fursa zilizopo kwenye programu kwa maendeleo yenu na taifa kwa ujumla" ameongeza Katibu Tawala Jane Chalamila.

"Niwapongeze pia viongozi wa ngazi ya Mkoa na Wilaya kwa kusimamia programu za masomo na mafunzo ambazo zimeonekana kuwa na manufaa kwa walengwa na ninawaaalika wadau wa elimu kuendelea kushirikiana na serikali katika kuwezesha ufanisi wa programu mbalimbali za elimu ya watu wazima kwenye Wilaya yetu ya Siha" amesema Katibu Tawala Chalamila.

Kauli mbiu maadhimisho hayo ni "Ujumuishi katika elimu bila ukomo kwa ujuzi, ustahimilivu, amani na maendeleo."