Siha kupatiwa 1.5 bilioni ujenzi Hospital ya Wilaya

Posted on: November 13th, 2018

Siha kupatiwa 1.5 Bilioni ujenzi Hospital ya Wilaya

Makamu wa Rais wa Jamhuri ya Muungano wa Tanzania mhe. Samia Suluhu Hassan amesema kuwa Serikali ya awamu ya tano itahakikisha inakamilisha ujenzi wa miundombinu yote katika Hospital ya Wilaya ya Siha.

Ahadi hiyo ameitoa tarehe 13/11/2018 alipokuwa akiweka jiwe la msingi katika Hospital ya Wilaya ya Siha iliyopo kata ya Sanya Juu Tarafa ya Siha Magharibi.

Makamu wa Rais wa Jamhuri ya Muungano wa Tanzania baada ya kuweka jiwe la msingi katika Hospital ya Wilaya ya Siha aliwaeleza wananchi wa Wilaya ya Siha kwamba,Serikali ya awamu ya tano chini ya Rais Magufuli itahakikisha ujenzi wa Hospital ya Siha unakamilika.

“Serikali yenu ya wanyonge mlioichagua itatoa jumla ya shilingi 1.5 bilioni ili kuhakikisha kuwa inakamilisha miundombinu katika hospital ya Wilaya ya Siha lengo likiwa ni kutoa huduma bora kwa wananchi wa Siha” alisema Makamu wa Rais wa Jamhuri ya Muungano wa Tanzania.

Awali  kabla ya kumkaribisha mhe. Makamu wa Rais wa Jamhuri ya Muungano wa Tanzania, Mkurugenzi Mtendaji wa Halmashauri ya Wilaya ya Siha ndugu Valerian Juwal alisoma taarifa ya Hospital ya Wilaya kwa makamu wa Rais wa Tanzania,ambapo taarifa hiyo ilieleza hatua mbalimbali zilizofikiwa katika ujenzi wa miundombinu katika Hospital ya Wilaya.

Taarifa hiyo ilieleza kuwa katika kipindi cha miaka mitatu mfufulilizo halmashauri ya Siha imepata mafanikio makubwa katika sekta ya afya,ambapo katika mwaka wa fedha  2017/2018 hakuna kifo cha mwanamke kilichotokea Wilaya ya Siha  kutokana na matatizo ya uzazi.

Kukamilika kwa ujenzi wa miundombinu katika Hospital ya Wilaya ya Siha kutasaidia kuwaondolea usumbufu wananchi wa Wilaya ya Siha ambao kwa muda mrefu wamekuwa wakifuata huduma kwa gharama kubwa katika Hospital ya Mkoa wa Kilimanjaro na ile ya rufaa ya KCMC zilizopo mjini Moshi.