shule ya Kata Siha yatoa mwanafunzi Bora Kitaifa kidato cha sita 2018

Posted on: July 13th, 2018

Shule ya Kata Wilaya Siha yatoa mwanafunzi bora Kitaifa

Hatimaye shule inayomilikiwa na Wananchi Wilaya ya Siha shule ya sekondari Sanya Juu(Sanya day) imefanikiwa kutoa mwanafunzi aliyeingia katika orodha  ya wanafunzi  kumi bora kitaifa kwa masomo ya Sayansi.

Hii ni kwa mujibu wa matokeo ya kidato cha sita 2018 yaliyotangazwa na katibu wa baraza la mitihani Tanzania (NECTA) Dkt. Charles msonda mapema leo asubuhi.

Matokeo yaliyotangazwa na Baraza la Mitihani Tanzania yameonyesha kuwepo kwa jina la mwanafunzi ADELARD MASSAE kutoka  orodha ya wanafunzi kumi bora kitaifa kwa masomo ya Sayansi.

Matokeo haya yameifanya  Wilaya ya Siha kuzidi kung’ara katika Nyanja ya elimu huku ikiziacha Wilaya kongwe kuanzishwa hapa mkoa wa Kilimanjaro na hata   shule zenye majina makubwa  zilizoanzishwa tangu kipindi cha uhuru wa Tanzania.

Akiongea baada ya matokeo ya kidato cha sita kutangazwa mkuu wa shule hiyo mwalimu  Elieta Kaaya alisema kuwa, matokeo hayo mazuri wameyapokea kwa furaha kubwa, kwani yatazidi kuitangaza shule hiyo kujulikana na jamii ndani na nje ya Wilaya ya Siha.

Mkuu huyo wa shule alisema kuwa  kupatikana kwa matokeo mazuri shuleni hapo  kumetokana na juhudi kubwa za walimu na wanafunzi  pamoja na ushirikiano mzuri wa wazazi pamoja na uongozi  mathubuti wa Ofisi ya Mkuu wa  Wilaya ya Siha na Halmashauri ya Wilaya ya Siha  kwa ujumla wake.

Aidha,shule ya sekondari sanya Juu ni shule inayochukua wanafunzi wa kidato cha kwanza hadi cha nne kutwa(mchanganyiko wavulana na wasichana) na wanafunzi wa kidato cha tano na sita mchepuo wa masomo ya sayansi(wavulana pekee). Shule hii inajumla ya wanafunzi 534 kidato cha kwanza hadi sita.

Shule ya sekondari Sanya Juu ni shule iliyoanzishwa mwaka 1999 na ni miongoni mwa shule 13 za Serikali zilizopo Wilaya ya Siha na miongoni mwa shule mbili za Serikali zinazochukua wanafunzi wa kidato cha 5 na 6 wanasomo mchepuo wa masomo ya Sayansi,shule nyingine kwa mchepuo wa sayansi Wilayani Siha ni Nuru Sekondari.

kupata matokeo ya shule ya sanya juu  2018 bofya matokeo ya kidato cha sita 2018 shule ya sekondari sanya juu halmashauri ya Wilaya ya siha-kilimanjaro