Sheria ndogo Siha kuboresha Ukusanyaji Mapato

Posted on: March 5th, 2019

Sheria ndogo Siha kuboresha ukusanya wa Mapato

Hatimaye Halmashauri ya Wilaya ya Siha Mkoa wa Kilimanjaro kupitia Mkutano Maalum wa  Baraza  la Waheshimiwa Madiwani limepitisha sheria ndogo mbalimbali za Halmashauri hiyo zitakazosaidia kuboresha ukusanyaji wa mapato ya ndani.

Mkutano huo maalum wa Baraza la Madiwani Siha umefanyika katika ukumbi wa mikutano wa Halmashauri ya Siha tarehe 6/3/2019, ambapo wajumbe wa mkutano huo kwa kauli moja wameazimia na kupitisha sheria ndogo za Halmashauri ya Siha mwaka 2019 zitakazosaidia  kuongeza wigo wa ukusanyaji wa  mapato ya ndani ya  Halmashauri ya Siha.

Akiongea na wajumbe wa Mkutano huo,Mwenyekiti wa Halmashauri ya Siha mhe. Godson Ngomuo aliwaeleza wajumbe kuwa sheria ndogo zilizopendekezwa na kuletwa mbele yetu zina lengo la kuongeza ukusanya wa mapato ya ndani ya Halmashauri kwa lengo la kuboresha utoaji wa huduma bora kwa Wananchi wa Siha.

“Napenda kuwaomba wajumbe wote wa mkutano huu tupitie  sheria ndogo zote mstari kwa mstari na kuboresha pale tunapoona panafaa kufanya maboresho na marekebisho  ili kuindoa Halmashauri yetu na tatizo la kuwa na vyanzo vichache vya mapato ya ndani” alisema Ngomuo.

Awali,Mwanasheria wa Halmashauri ya Wilaya ya Siha Gabriel Sasi  aliwasilisha orodha ya mapendekezo ya sheria ndogo za Halmashauri ya Siha  zitakazosaidia kuongeza wigo wa mapato ya ndani mbele ya  wajumbe wa mkutano huo kuwa  ni pamoja na sheria ya  ushuru wa kukodi ardhi kwa ajili ya Kilimo,sheria ya Usafi na Mazingira, sheria ya Ada na Ushuru,sheria ya kuzuia unywaji wa pombe saa za kazi,sheria ya ushuru wa Stendi(vituo vya Mabasi).

Aliendelea kusema kuwa  sheria ndogo  nyingine zinazopendekezwa na Halmashuari ya Siha  ni kama vile  sheria ya ushuru wa huduma,ushuru wa madini ya ujenzi,sheria ya usimamizi na uendeshaji wa Masoko na Magulio na sheria ya Vijiji(sheria ya Serikali za mitaa mamlaka ya Wilaya.

Kupitishwa kwa sheria ndogo hizi kutasaidia Halmashauri ya Wilaya ya Siha kuongeza ukusanyaji wa mapato ya ndani ambayo yataongeza uboreshaji wa utoaji wa huduma bora kwa jamii kama vile afya,elimu,maji,na huduma nyingine muhimu kwa wananchi na wakazi wa Wilaya ya Siha.

Mapendekezo ya sheria hizi ndogo za Halmashauri ya Siha yaliyopitishwa na Baraza la Madiwani tarehe 6/3/2019 zitaanza kutumika mara baada ya Waziri mwenye dhamana na Serikali ya Mitaa atapoweka saini yake  na kutangazwa katika gazeti la Serikali.