RENEAL INTERNATIONAL YAKABIDHI MAABARA ZA TEHAMA NNE SIHA

Posted on: July 24th, 2025

Shirika lisilo la kiserikali (NGO) la Reneal International Education Outreach limekabidhi maabara za TEHAMA katika shule nne (4) za Sekondari zenye Jumla ya kompyuta mpakato 80 na Server Moja katika kila maabara.

Shirika la Reneal International Education Outreach limekabidhi Maabara hizo za TEHAMA leo Julai 24, 2025 kwa lengo la kuziwezesha shule za sekondari kuwa na maktaba za mtandaoni (e-Library) zenye vitabu ya kiada na ziada, video za mafunzo ya masomo mbalimbali na mafunzo kwa vitendo (Simulation) kwa Masomo ya sayansi.

Akizungumza kwa niaba ya Mkuu wa Wilaya ya Siha wakati wa kupokea maabara hizo katika Shule ya Sekondari Namwai Katibu Tawala Wilaya ya Siha Bi. Jane Chalamila amelishukuru shirika la Reneal International Education Outreach kwa kufanikisha kupatikana kwa maabara za kisasa za TEHAMA katika Shule za Sekondari Oshara, Namwai, Sanya Juu na Nuru.

“Tulishukuru sana Shirika la Reneal International Education Outreach kupitia mratibu wake David Nyangaka kwa kufanikisha kupatikana maabara za kisasa kabisa za TEHAMA na tunakuahidi tutazitunza vizuri zaidi vifaa hivi ili zilete manufaa yaliyotarajiwa kwa walimu na wanafunzi” amesema Katibu Tawala Bi. Jane Chalamila.

“Nitoe rai kwa wanafunzi wa shule zilizopokea maabara hizi za TEHAMA kuzitumia kikamilifu kujifunza kwa bidii na ufanisi,  na mkikutana na wanafunzi katika maeneo ambayo hawana maabara hizi waelekezeni ili ziwe na manufaa kwa wote” ameongeza Chalamila.

Awali akizungumza kabla ya kukabidhi maabara hizo mratibu wa shirika la Reneal International Education Outreach David Nyangaka amesema baada kukabidhi maabara hizo shirika linatarajia kuongeza tija na ufanisi kwa walimu na wanafunzi na kuongeza ufaulu.

Tumekabidhi maabara nne za TEHAMA zenye jumla ya Kompyuta mpakato 20 na Server moja kila maabara yenye vitabu vyote vya kiada na ziara, mitihani ya kitaifa kuanzia mwaka 1988 hadi 2024, mafunzo kwa vitendo (Simulation) kwa Masomo ya sayansi ambazo zitazipunguzia shule gharama ya kununua kemikali kwa ajili ya mafunzo kwa vitendo” amesema David Nyangaka. 

Kwa upande wake, Kaimu Mkurugenzi Mtendaji Dkt Paschal Mbota amewasihi walimu na wanafunzi katika shule zilizopata maabara za TEHAMA kuvitunza na kuvitumia kikamilifu vifaa vilivyopo katika maabara hizo ili zilete tija.

Naye,Kaimu Afisa Elimu Mkoa wa Kilimanjaro Evance Panja amesema Serikali iatendelea kushirikiana na shirika la Reneal International Education Outreach ili kuwezesha shule nyingine za Sekondari Wilaya ya Siha na Mkoa wa Kilimanjaro  kupata maabara hizo za kisasa za TEHAMA.

Mpaka sasa shirika lisilo la kiserikali la Reneal International Education Outreach limefanikiwa kufunga kompyuta mpakato pamoja na server zake 210 katika Mkoa wa Kilimanjaro ambapo Wilaya ya Siha imepata Kompyuta mpakato 80.

Viongozi wa Serikali na Shirika la Reneal International Eduacational Outreach walioshiriki katika makabidhiano ya maabara nne zenye kompyuta mpakato 20 na Server moja kila maabara katika shule ya Sekondari Namwai, oshara, Sanya Juu na Nuru