RC Kilimanjaro atoa onyo Kali kwa watumishi wa Umma

Posted on: November 20th, 2017

Mkuu wa Mkoa wa Kilimanjaro mhe. Anna Mghwira ametoa onyo Kali kwa watumishi wa Umma Mkoa wa Kilimanjaro wasiowatumikia wananchi kwa uaminifu katika ofisi za Umma.

Kauli hiyo imetolewa Wilaya ya Siha na Mkuu wa Mkoa wa Kilimanjaro  katika Kata ya Sanya juu tarehe 20 novemba 2017 ,alipokuwa katika ziara ya siku mbili kwa ajili ya ukaguzi wa shughuli za maendeleo pamoja na kuhamasisha wananchi kuendelea kuunga mkono juhudi za Serikali katika kuongeza kipato.

Katika ziara yake hiyo iliyoanza kwa kukutana na wanachama wa AMCO Sanya juu,aliwataka wanachama hao wa ushirika kuliendeleza zao la kahawa kwani ndilo zao linaloweza kuwakomboa kiuchumi na kuliletea taifa fedha za kigeni.

Awali akimkaribisha Mkuu wa Mkoa ,Mkuu wa Wilaya ya Siha mhe.Onesmo Buswelu akimwakikishia Mkuu wa Mkoa kuwa,wananchi wa Wilaya ya Siha wanaunga mkono jitihada za Serikali ya awamu ya tano yenye mpango mkakati wa kuinua kipato Cha wananchi kwa kujenga viwanda maeneo mbalimbali ya Nchi yetu.

Mkuu wa Mkoa akiongea na wanachama wa AMCOS Sanya juu aliwataka watumishi wote wa Umma kutoa huduma kwa wananchi bila kudai chochote kwani Serikali inawalipa mishahara Kila mwezi hivyo hawana budi kutoa huduma kwa kiwango kinachotakiwa.

Aidha ,alieleza kuwa mtumishi yeyote anayeshindwa kwenda na Kasi ya Serikali ya awamu ya tano ni wakati sasa ajitathmini na kuwapisha watumishi wenye moyo wa kuwahudumia wananchi.

Alieleza kuwa wapo watumishi wa Umma ambao siyo waadilifu wanachezea ofisi za Umma Kama mali zao binafsi,wakati wa kufanya Kazi kwa mchezo umekwisha na sasa Kila mtumishi anatakiwa kutambulika na kujulikana kwa wananchi anaowahudumia katika eneo lake la Kazi.