RC Kilimanjaro Aipongeza Halmashauri ya Siha kwa Kupata Hati Safi kwa Miaka Mitatu Mfululizo

Posted on: July 2nd, 2024

Mkuu wa Mkoa wa Kilimanjaro Mhe. Nurdin Babu ameipongeza Wilaya ya Siha kwa kupata hati safi kwa miaka mitatu mfulululizo.

Akizungumza wakati wa mkutano maalum wa kujadili hoja za mdhibiti na mkaguzi mkuu wa Hesabu za serikali leo Julai 02, 2024 uliofanyika katika ukumbi wa makao makuu ya halmashauri ya Wilaya ya Siha, Mhe Nurdin Babu amesema Wilaya ya Siha inachangia kwa kiasi kikubwa Mkoa wa Kilimanjaro kuendelea kufanya vizuri kitaifa.

Mhe Nurdin Babu amewaelekeza Mwenyekiti wa Halmashauri, Mkurugenzi Mtendaji na Waheshimiwa madiwani kuendelea kusimamia na kuhakikisha hakuzalishwi hoja zaidi ya mbili wakati wa ukaguzi wa  Mdhibiti na Mkaguzi Mkuu wa Hesabu za Serikali – CAG Mwaka 2024/2025.

“Nataka wakuu wa idara wote washiriki kikamilifu katika suala zima la kuzuia uwepo wa hoja na kuzijibu hoja za ukaguzi, nyinyi wakuu wa idara ndio tunawategemea, muwasaidie sana waheshimiwa madiwani kuchakata na kujibu hoja zote kwa ufanisi kama mlivyofanya sasa” amesema Mkuu wa Mkoa wa Kilimanjaro Mhe. Nurdin Babu.

“Mkurugenzi endeleeni kumuwezesha Mkaguzi wa Ndani afanye kazi yake, kwa sababu yeye ndio anajua hili tusipolitekeleza itakuwa hoja na tukitekeleza haitakuwa hoja kwa hiyo msaidieni mkaguzi wa ndani” ameongeza Mhe Nurdin Babu.

Kikao hicho cha kujadili hoja za Mdhibiti na Mkaguzi Mkuu wa Hesabu za Serikali – CAG kimefanyika ambapo Halmashauri ya Wilaya ya Siha imewasilisha hoja nane za ukaguzi zilizojadiliwa na kutolewa maelekezo na waheshimiwa madiwani mbele ya Mkuu wa Mkoa wa Kilimanjaro Mhe Nurdin Babu.