Rais Samia atoa ajira mpya 102 watumishi wa Umma Siha 2021/2022

Posted on: August 16th, 2022

Rais Samia atoa ajira mpya 102 Halmashauri ya Siha 2021/2022

Serikali ya Rais Samia Suluhu Hassan imetoa ajira 102 za watumishi wa umma katika kada mbalimbali katika Halmashauri ya  Wilaya ya Siha  katika mwaka wa fedha 2021/2022.

Mkurugenzi Mtendaji wa Halmashauri ya Wilaya ya Siha ndugu Pendo Mangali amesema hayo leo tarehe 16/08/2022 wakati akisoma taarifa ya utendaji kazi wa Halmashauri ya Wilaya ya  Siha katika ukumbi wa mikutano wa Halmashauri.

Taarifa hiyo ya Mkurugenzi Mtendaji imeeleza kuwa kati ya watumishi 102 wapya walioajiriwa Halmashauri ya Wilaya ya  Siha mwaka  2021/2022, watumishi 47 ni sekta ya afya, 37 ni sekta ya elimu,10 watendaji wa Vijiji, watumishi 04 ni madereva na 04 ni Makatibu Muhtasi.

Aidha,Taarifa hiyo imesema kuwa katika Halmashauri ya Wilaya ya Siha kwa  mwaka wa fedha 2021/2022  watumishi 627 wa  kada mbalimbali wamepandishwa vyeo na Serikali ya awamu ya Sita inayoongozwa na mhe. Samia Suluhu Hassan Rais wa Jamhuri ya Muungano wa Tanzania.

Katika kipindi cha 2021/2022 pia wapo watumishi 303 wamelipwa malimbikizo ya mishahara ambapo jumla ya shilingi Milioni 555.56 zimetolewa na Rais Samia katika kulipa madeni ya watumishi alisema na kuongeza Mangali.

Napenda kuwajulisha kuwa watumishi wa umma kwa sasa wamejawa na furaha kubwa kwani stahiki zao mbalimbali zimelipwa ikiwemo madeni ya mishahara na isiyo ya mishahara na zaidi ni nyongeza ya mishahara ya asilimia 23.3 iliyotolewa kuanzia mwezi Julai 2022 amesema Mangali.

Hata hivyo Mkurugenzi Mtendaji Halmashauri ya Siha amesema kuwa Watumishi wa Umma katika Halmashauri ya Siha wameahidi kufanya kazi kwa bidii na maarifa katika kufanikisha malengo ya Rais Samia ya kuboresha maisha ya Watanzania

Halmashauri ya Wilaya ya Siha inajumla ya watumishi wa umma 1,133 wanaofanya kazi katika sekta mbalimbali katika utoaji wa huduma bora kwa wananchi na wakazi wa Wilaya ya Siha.