NAWAPONGEZA SANA KWA KUPEPERUSHA VYEMA BENDERA YA WILAYA YA SIHA KWENYE MASHINDANO YA SHIMISEMITA - DKT MNASI

Posted on: September 9th, 2024

Mkurugenzi Mtendaji wa Halmashauri ya Wilaya ya Siha Dkt Haji Mnasi amewapongeza wachezaji wote waliopeperusha bendera ya Halmashauri katika mashindano ya Shirikisho la Michezo Serikali za Mitaa Tanzania SHIMISEMITA 2024 na kuwezesha kupatikana kwa medali ya mshindi wa tatu kwenye mchezo wa riadha na Cheti cha ushiriki kwa mara ya kwanza.

Dkt Mnasi ametoa pongezi hizo leo septemba 09, 2024 baada ya wachezaji walioshiriki mashindano ya SHIMISEMITA 2024 Jijini Mwanza kufika ofisini kwake kuwasilisha cheti cha ushiriki na kumshukuru Mkurugenzi kwa ushirikiano aliowapa wakati wote wa mashindano.

Amesema licha ya kuchukua medali moja pekee ya mshindi wa tatu wa riadha lakini wachezaji wote wamepeperusha vyema bendera ya siha.

Amewahakikishia kuwa mashindano ya SHIMISEMITA 2025 yatakayofanyika Mkoani Tanga, Halmashauri ya Wilaya ya Siha itaongeza idadi ya washiriki na idadi ya michezo itakayoshiriki.

"Mwisho wa Mashindano ya mwaka huu ni maandalizi ya mwaka ujao, niwaombe muendelee kujifua na kujiboresha ili tutakapoenda Tanga tukafanye vizuri zaidi ya mwaka huu" Amesema Mkurugenzi Mtendaji Dkt Mnasi.

Halmashauri ya Wilaya ya Siha imeshiriki kwa mara ya kwanza kwenye Mashindano ya Shirikisho la Michezo Serikali za Mitaa Tanzania SHIMISEMITA 2024 yaliyofanyika Mkoani Mwanza na kufanikiwa kushika nafasi ya tatu katika Mchezo wa Riadha ambapo Mwanariadha Mwanariadha Dickson Mlay alitunukiwa medali.