Mwenye Halmashauri ya Siha awapongeza watumishi kwa kufanya kazi kazi kwa ushirikiano na weledi

Posted on: June 24th, 2024

Mwenyekiti wa Halmashauri ya Wilaya ya Siha Mhe Duncan Urassa amewapongeza watumishi wa umma Wilaya ya Siha kwa ushirikiano na umoja walionao wakati wote wanapowahudumia wananchi na kutekeleza majukumu yao ya kila siku.

Pongezi hizo amezitoa leo Juni 24, 2024 aliposhiriki zoezi la kufanya usafi katika kituo cha mabasi Sanya Juu ikiwa ni sehemu ya Maadhimisho ya Wiki ya Utumishi wa Umma yaliyoanza Juni 16 – 23, 2024, ambapo amesema mwaka 2024 watumishi wamefanya kazi kubwa na kwa ushirikiano.

Amesema wakati wanahitimisha wiki ya maadhimisho ya utumishi wa umma kwa mwaka 2024, ni vyema wakajikumbusha waliyofanya na kuboresha penye upungufu ili kuendelea kutoa huduma bora kwa wananchi na wakazi wa Wilaya ya Siha.

Amewahimiza watumishi kuendeleza ushirikiano, kufanya kazi kwa bidii, weledi na kwa kufuata sheria, kanuni na miongozo ya serikali na maadili ya Utumishi wa umma.

Maadhimisho ya wiki ya utumishi wa umma kwa mwaka 2024 yanaongozwa na kaulimbiu inayosema, Kuwezesha kwa Utumishi wa Umma Uliojikita kwa Umma wa Afrika ya Karne ya 21 Iliyojumuishi na Inayostawi: Ni Safari ya Mafunzo na Mabadiliko ya Teknolojia.

Maadhimisho haya hufanyika kila mwaka kuanzia Juni 16 – 23 na ni mojawapo ya matukio katika kalenda ya umoja wa Afrika (AU) ambapo nchi wanachama huadhimisha kwa kufanya kongamano na maonesho ya kazi mbalimbali kuhusu Utumishi wa Umma.

Viongozi na Watumishi wa Umma Wilaya ya Siha wakishiriki zoezi la usafi wa mazingira katika kituo cha mabasi Sanya Juu leo Juni 24, 2024 ikiwa ni sehemu ya Maadhimisho ya Wiki ya Utumishi wa Umma