Msitumie Madaraka Vibaya : Dkt. Timbuka DC Siha

Posted on: February 8th, 2024

Msitumie madaraka  Vibaya  - Dkt. Timbuka

Mkuu wa Wilaya ya Siha Mhe. Dkt Christopher Timbuka amewaagiza Watendaji wa Kata na Vijiji  Wilayani Siha kufanya kazi kwa weledi na kutenda haki huku wakifuata sheria, kanuni na taratibu za utumishi wa Umma.

Mhe. Dkt Timbuka ametoa kauli hiyo leo Februari 08, 2024 wakati wa kikao kazi cha maandalizi ya mapokezi ya Mwenge wa Uhuru kilichofanyika katika ukumbi wa mikutano wa makao makuu ya Halmashauri ya Wilaya ya Siha ambapo amewataka baadhi ya  watendaji wa umma  kuacha kutumia madaraka vibaya.

Amesema ikibainika mtendaji wa Kata au Kijiji  ametumia madaraka na dhamana aliyopewa na Serikali vibaya kwa lengo la kuwaumiza wananchi, hatua kali za kisheria zitachukuliwa dhidi yake ili kukomesha tabia hiyo.

“Tusitumie madaraka tuliyopewa  vibaya, na unapoyatumia vibaya na kusababisha uvunjifu wa amani mimi kama kiongozi nitahakikisha unachukuliwa hatua, lakini tusingependa tufikie huko, fanyeni kazi kwa weledi na kwa kufuata utaratibu uliopo” amesema Dkt Timbuka.

“Kuna makosa mengine ambayo tumekuwa hatutoi ushirikiano sisi kama Watendaji wa Serikali, naomba sana tuwajibike, kwa mfano kuna matukio ya kubaka na kulawiti  yametokea hivi karibuni na baadhi ya watendaji siwataji walidhubuti kuegemea upande wa wahalifu kwa kuwatetea na kujaribu kuharibu ushahidi, jambo kama hili halikubaliki” ameongeza Dkt Timbuka

Kwa upande mwingine, Mkuu wa Jeshi la Polisi Wilaya ya Siha, Mrakibu Mwandamizi wa polisi (SSP) Zakia Shuma amewaomba watendaji wa Kata na Vijiji Wilaya ya Siha kutokuweka vikwazo au visingizio vya kuwanyima  wananchi  haki yao ya kupata barua za kupata dhamana Polisi  kwani hali hiyo  inalichafua Jeshi la Polisi Wilayani Siha.

“Sheria za dhamana zipo wazi kabisa na sisi kama Watendaji wa Serikali tunalijua hilo, sasa inapotokea mwananchi anakosa haki yake kwa sababu mtendaji haujampa barua ya kupata haki yake ya dhamana  inanisitikisha sana, niwaombe Watendaji wa Kata na Vijiji muweke uzalendo mbele wa kuwahudumia wananchi kwa kufuata sheria za nchi” amesema mrakibu Mwandamizi wa Polisi - SSP Zakia Shuma.