MSIMAMIZI WA UCHAGUZI SIHA ATOA MAELEKEZO YA UCHAGUZI

Posted on: September 26th, 2024

Msimamizi wa Uchaguzi Wilaya ya Siha Dkt Haji Mnasi ametoa maelekezo kuhusu uchaguzi wa serikali za mitaa utakaofanyika Novemba 27, 2024.

Dkt Mnasi ametoa maelekezo hayo leo tarehe 26 Septemba, 2024 katika ukumbi wa kanisa katoliki uliopo katika Kata ya Sanya Juu ambapo maelekezo hayo yameelezea masuala muhimu ya uchaguzi.

Amesema tarehe ya kufanyika kwa Uchaguzi ambayo ni 27 Novemba, 2024 na Uandikishaji wa wapiga kura utafanyika kwa muda wa siku kumi kuanzia tarehe 11 Oktoba, 2024 hadi tarehe 20 Oktoba 2024.

Dkt Mnasi pia amesema uandikishaji wa wapiga kura utafanyika kwenye majengo ya umma na pale ambapo hakuna jengo la umma, uandikishaji utafanyika sehemu ambayo Msimamizi Msaidizi wa Uchaguzi atakuwa amekubaliana na viongozi wa vyama vya siasa.

"Fomu za kugombea nafasi za uongozi katika uchaguzi zitatolewa kuanzia tarehe 01 Novemba hadi tarehe 7 Novemba 2024, kuanzia saa moja na nusu asubuhi hadi saa kumi kamili jioni" amesema Dkt Haji Mnasi Msimamizi wa Uchaguzi Wilaya ya Siha.

Viongozi watakaochaguliwa katika uchaguzi wa Serikali za Mitaa ni Mwenyekiti wa Kijiji, Wajumbe wa Halmashauri ya Kijiji na Mwenyekiti wa Ktongoji.

Uchaguzi huu wa Serikali za Mitaa utaongozwa na kauli mbiu isemayo, "Serikali za Mitaa, Sauti ya Wananchi, Jitokeze kushiriki Uchaguzi."