MKUU WA WILAYA AWAELEKEZA VIONGOZI WA VYAMA VYA USHIRIKA KUFUATA KANUNI, TARATIBU

Posted on: November 16th, 2023

Mkuu wa Wilaya ya Siha Mhe. Dkt Christopher Timbuka amewaelekeza viongozi wa vyama vya ushirika Wilaya ya Siha kufanya kazi kwa kuzingatia sheria, kanuni, taratibu na miongozo inayowaongoza ikiwemo kuwasomea taarifa ya mapato na matumizi wanachama.

Mhe. Dkt Timbuka ametoa maelekezo hayo leo Novemba 16, 2023 kwenye kikao kazi na viongozi wa vyama vya ushirika Wilaya ya Siha kilichofanyika kwenye ukumbi mkubwa wa Makao Makuu ya Halmashauri ya Wilaya ya Siha chenye lengo la kujadili changamoto, mafanikio na mikakati ya kuboresha vyama vya ushirika Wilaya ya Siha.

Amesema viongozi wa vyama vya ushirika wakifanya kazi yao kwa kuzingatia sheria kanuni taratibu na miongozo ikiwa ni pamoja na kuwasomea taarifa ya mapato na matumizi ya vyama kwa uwazi, kufanya vikao vilivyopo kikanuni na kuwashirikisha katika maamuzi yanayohusu mali za chama kutasaidia kwa kiasi kikubwa kumaliza migogoro baina ya wanachama na viongozi.

Pia Mhe Dkt Timbuka amesema malalamiko au kero au taswira mbovu kuhusu vyama vya ushirika ni viongozi kuboresha utendaji kazi wao kwa kuzingatia kanuni, taratibu na miongozo ya vyama.

"Watakaosaidia kuondoa malalamiko na taswira mbovu kuhusu vyama vya ushirika ni nyinyi viongozi kuwa wawazi kwenye utendaji kazi, kufuata kanuni, taratibu na miongozo, kufanya vikao vilivyopo kikanuni na  kuondoa maslahi binafsi kwenye vyama" amesema Mkuu wa Wilaya ya Siha Mhe. Dkt Timbuka.

"Viongozi mkiyafanya hayo wanachama watarithika, wakiona mali zao zipo salama, kazi zao zinafanyika vizuri na rasilimali zao ziko salama hawatakuwa na jambo lolote la kuhofia uongozi wenu" ameongeza Mhe. Dkt Timbuka

Kikao kazi hicho cha viongozi wa vyama vya ushirika Wilaya ya Siha ni muendelezo wa vikao ambavyo Mkuu wa Wilaya ya Siha Mhe. Dkt Christopher Timbuka amekuwa akifanya kwa lengo la kusikiliza kero na kuzitafutia ufumbuzi ili kuboresha utolewaji wa huduma kwa Wananchi wa Wilaya ya Siha.