MKURUGENZI TUSAIDIA KUFANYA TATHMINI YA ATHARI ZA MVUA KWENYE KILA KATA – MHE URASSA

Posted on: May 7th, 2024

Mwenyekiti wa Halmashauri ya Wilaya ya Siha Mhe Duncan Urassa amuelekeza Mkurugenzi Mtendaji kufanya tathmini ya athari za mvua zinazoendelea kunyesha katika kila Kata katika makazi na eneo la mazao ya chakula ili isaidie kuandaa mazingira rafiki yatakayoiwezesha Halmashauri kukabiliana na changamoto zitakazojitokeza.

Akizungumza wakati wa kufunga Mkutano wa Baraza la Madiwani la kujadili taarifa za Kata uliofanyika leo Mei 07, 2024 katika ukumbi wa mikutano wa makao makuu ya Halmashauri, Mhe Urassa amesema kama hakutakuwa na taarifa na mikakati mizuri ya kukabiliana na athari za mvua zinazoendelea kunyesha huenda changamoto ikawa kubwa kwa wananchi.

Amesema licha ya mvua kuendelea kunyesha mazao mengi yameathiriwa hali inayotishia kuwepo kwa upungufu mkubwa wa chakula kwa wananchi.

“Nikuombe Mkurugenzi utusaidie kufanya tathmini kila Kata kuhusu athari za mvua zinazoendelea kunyesha, kwa kuangalia maeneo yaliyoathirika na watu wa kilimo watuambie ni kwa kiasi gani mazao ya chakula yameathiriwa na mvua, taarifa hiyo ya tathmini itatusaidia kwa kiasi kikubwa kuchukua tahadhari” amesema Mwenyekiti wa Halmashauri ya Wilaya ya Siha Mhe Duncan Urassa

“Tunaweza kuona mvua zinanyesha tukafikiri chakula kitakuwepo cha kutosha, lakini kiuhalisia kunaweza kukawepo upungufu wa chakula kutokana na mazao ya chakula kuathiwa na mvua zinazoendelea kunyesha, sasa ili tupate taarifa sahihi tunaomba Mkurugenzi utusaidie kuiandaa na ikiwasilishwa kwa kila kata itakuwa nzuri zaidi” ameongeza Mhe Urassa.