Mfumo mpya wa utoaji mikopo asilimia 10 kuanza Julai,2024

Posted on: April 17th, 2024

Halmashauri ya Wilaya ya Siha mkoa wa Kilimanjaro ni miongoni mwa Halmashauri 10 hapa Nchini Tanzania zilizowekwa katika mpango wa majaribio utoaji mpya wa mikopo ya asilimia 10 ya vikundi vya Wanawake ,Vijana na Watu wenye ulemavu kuanzia mwezi Julia,2024.

Kauli hiyo imetolewa bungeni tarehe 16 Aprili 2024 na Mhe. Mohamed Mchengerwa Waziri wa Nchi, Ofisi ya Rais, TAMISEMI wakati akiwasilisha hotuba kuhusu makadirio ya Mapato na Matumizi ya Wizara ya TAMISEMI Kwa mwaka wa fedha 2024/2025.

Amesema kuwa, Serikali imeamua mikopo ya asilimia 10 kwa vikundi vya Wanawake, Vijana na Watu wenye Ulemavu iliyokuwa imesitishwa hapo awali imerejeshwa kwa majaribio kuanzia mwezi Julai 2024 katika Halmashauri 10 hapa Nchini kwa mfumo mpya wa usimamizi.

Waziri Mchengerwa amezitaja Halmashauri zote 10 zitakazokuwa za majaribio hapa Nchini ni Halmashauri ya Majiji ya Dar es salaam na Dodoma, Manispaa za Kigoma Ujiji na Songea, Halmashauri za miji ni Newala na Mbulu pamoja na Halmashauri za Wilaya ya SIHA, Nkasi, Itilima na Bumbuli.

Utaratibu ulioboreshwa unahusisha uanzishwaji wa Kitengo cha Usimamizi wa utoaji wa mikopo kwa vikundi vya Wanawake, Vijana na Watu wenye Ulemavu katika Ofisi ya Rais, TAMISEMI ikiwa ni pamoja na uanzishwaji wa Kamati ya usimamizi wa utoaji wa mikopo katika ngazi za Ofisi za Wakuu wa Mikoa, Halmashauri na Kata.

Mhe.Waziri Mchengerwa amesema kuwa, miongoni mwa majukumu ya Kamati ngazi ya Kata ni pamoja na kutambua waombaji, kuthibitisha vikundi vya mikopo na kuvisajili katika mfumo mpya unaitwa Wezesha Portal na baada ya usajili Kamati itawasilisha ngazi ya Wilaya kwa hatua zaidi.

Uboreshaji wa mfumo huu mpya wa utoaji wa mikopo kwa Vikundi vya Vijana,Wanawake na Watu wenye ulemavu utaondoa changamoto mbalimbali zilizokuwa hapo awali kabla ya zoezi la utoaji wa mikopo kusimamishwa mwezi Aprili,2023.