Mawakala wa pembejeo Siha watakiwa kuzingatia bei elekezi -DC Siha

Posted on: March 2nd, 2018

Mawakala na wafanyabiashara wa pembejeo za kilimo Wilayani Siha wametakiwa kuzingatia bei elekezi ya pembejeo za kilimo iliyotolewa na Serikali kwa mwaka huu wa msimu wa kilimo 2017/2018.

Hayo yamesemwa na Mkuu wa Wilaya ya Siha mh. Onesmo Buswelu katika kikao cha Mawakala na Wafanyabiashara wa pembejeo za kilimo kilichokutana katika  ukumbi wa mikutano wa Halmashauri ya Wilaya ya Siha tarehe 01.3.2018.

Kikao hicho kiliwajumuisha Wafanyabiashara, Mawakala wa pembejeo za kilimo  Wilaya ya Siha,Watendaji wa Kata ,maofisa ugani wa vijiji vyote Siha  pamoja na  baadhi ya wakulima kutoka  maeneo mbalimbali ya Wilayani Siha.

"Napenda kutoa agizo kwa Mawakala na Wafanyabiashara wote wa pembejeo Wilaya ya Siha kuzingatia bei ilekezi iliyotolewa na serikali pamoja na bei tuliyokubaliana katika kikao hiki,naomba kila mmoja azingatie haya na atakayekiuka maelekezo tuliyokubaliana ajiandae kukutana na mkono wa sheria"alisema Buswelu.

Aidha,alitoa wito kwa wananchi na wakulima wa Wilaya ya Siha kudai risiti kila wanapokwenda kununua pembejeo za kilimo kutoka kwa Mawakala na wafanyabiashara walioidhinishwa katika Wilaya ya Siha.