Kata ya Mitimirefu Yapokea Shilingi Milioni 584 kwa Ajili ya Ujenzi wa Shule ya Sekondari

Posted on: July 3rd, 2024

Naibu Waziri wa Afya na Mbunge wa Jimbo la Siha Mhe Dkt Godwin Mollel amesema Serikali imeipatia Kata ya Mitimirefu Shilingi Milioni 584 kwa ajili ya ujenzi wa Shule mpya ya Sekondari ili kuwapunguzi adha wanafunzi wanaotembea kilomita 14 kila siku kufuata elimu.

Akizungumza katika mkutano na wananchi wa Kata ya Mitimirefu leo Julai 03, 2024, Naibu Waziri wa Afya Mhe Mollel amesema changamoto ya kutembea umbali mrefu, kukwepa wanyama wakali, kuacha shule na mimba za utotoni zilizokuwa sikisababishwa na ukosefu wa shule ya sekondari katika Kata ya Mitimirefu zitamalizika baada ya kukamilika kwa ujenzi wa shule mpya ya sekondari.

Amesema baada ya kufikisha changamoto hizo wanazokutana nazo watoto wa Kata ya Mitimirefu Serikali imekubali na kuleta fedha ili kujenga shule mpya ili watoto wapate elimu bora katika mazingira bora.

Amewahimiza wananchi kushirikiana na Serikali kwa kuongeza nguvu ya kazi ndogondogo kama kuchimba msingi na kujaza vifusi ili utekelezaji wa mradi huo ufanyike kwa haraka na uanze kutoa huduma iliyokusudiwa.

“Mmenituma nikafanye kazi ili kuiletea maendeleo Wilaya ya Siha, na tunapohakikisha watoto wanapata elimu bora katika maeneo yao ni maendeleo, tunapowajengea Zahanati ni maendeleo, tunapojenga barabara na kuwaletea maji karibu ni maendeleo” amesema Mhe. Dkt Mollel.

Naibu Waziri wa Afya na Mbunge wa Jimbo la Siha Mhe Dkt Godwin Mollel anafanya ziara katika Wilaya ya Siha ya kukagua miradi, kukagua hali ya utoaji wa huduma za afya na kuongea na watumishi wa sekta ya afya.