Karibu Mwenge wa Uhuru Wilaya ya Siha tarehe 12 Juni,2022

Posted on: June 10th, 2022

Mwenge wa Uhuru utapokelewa Wilayani Siha katika Kijiji cha Lawate Kata ya Kirua tarehe 12.6.2022 muda wa saa 12 kamili asubuhi  ukitokea Wilaya ya Hai

Kauli hiyo imetolewa na Mkuu wa Wilaya ya Siha mhe. Thomas Apson akiwa katika maandalizi kabambe ya kuupokea mwenge wa Uhuru Wilaya ya Siha tarehe 12 Juni,2022.

Amesema kuwa maandalizi ya kupokea mwenge wa Uhuru  katika Wilaya ya Siha  yanaendelea vizuri na yapo katika hatua za mwisho mwisho na Wananchi wa Wilaya ya Siha wanausubiri Mwenge wa Uhuru utakapofika waupokee na kuulaki kwa shangwe na nderemo.

Napenda kuwafahamisha kuwa Mwenge wa Uhuru utakapokuwa katika Wilaya ya Siha utakwenda katika maeneo yafuatayo; utapokelewa Kiwilaya  katika kijiji cha Lawate .siku ya Jumapili saa 12 asubuhi na baadaye utatembelea mradi wa vijana wa mafundi ya kuchomelea vyuma na samani katika Kata ya Sanya Juu alisema mhe.Thomas Apson.

Aidha,ameeleza kuwa Mwenge utaweka jiwe la Msingi Zahanati ya Mwangaza Kata ya Ngarenairobi pamoja na kutembelea mradi wa kitalu cha miti shamba la miti West Kilimanjaro uliopo katika kata hiyo.

Amesema baada ya hapo Mwenge utaweka jiwe la Msingi katika ujenzi wa barabara mpya ya Lami Kata ya Gararagua na kutembelea klabu ya kupambana na rushwa katika shule ya Sekondari Magadini, ameongeza kuwa Mwenge pia utafanya ufunguzi ujenzi wa shule shikizi ya Msingi Neema na kuweka jiwe la msingi kituo cha afya Olkolili kabla ya kuwa na mkesha katika stendi ya Mabasi KIA.

Mkuu wa Wilaya ya Siha ametoa wito kwa Wananchi na Wakazi wa Wilaya ya Siha kujitokeza kwa wingi katika mbio za Mwenge Wilaya ya Siha kwa mwaka 2022 kuanzia eneo la mapokezi,kwenye miradi hadi mkesha wa mwenge na baadaye kuukabidhi katika mkoa wa Manyara siku ya jumatatu tarehe 13.6.2022