Kampeni Upimaji afya kwa hiari yazinduliwa Kiwilaya

Posted on: September 26th, 2018

Kampeni ya Pima ,jitambue , na Ishi yazinduliwa Wilayani Siha

Hatimaye Wilaya ya Siha Mkoa wa Kilimanjaro leo tarehe 26.09.2018 imezindua kampeni ya kupima afya inayojulikana kwa jina la  “FURAHA YANGU”.

Kampeni hiyo imezinduliwa Kiwilaya  na Katibu Tawala Wilaya ya Siha mhe. Joseph Mabiti ambaye alimwakilisha mkuu wa Wilaya ya Siha.

Uzinduzi huo umefanyika leo  kijiji cha Sanya Juu katika eneo la jengo jipya la soko la Sanya Juu lililopo Kata ya Sanya Juu Tarafa ya Siha kati.

Akiwa katika shughuli ya uzinduzi katibu Tawala wa Wilaya ya Siha ndugu Joseph Mabiti aliwataka wananchi na wakazi wa Wilaya ya  Siha kujitokeza kwa wingi kupima afya zao ambapo alieleza kuwa  huduma hiyo itatolewa bure  bila malipo yoyote.

Alieleza kuwa takwimu zinaonyesha kuwa wanaume wengi bado hawajahamasika kupima afya kwa hiari na hivyo kukwamisha jitihada za Serikali kujua hali ya afya za wananchi wake ambayo inasaidia Serikali  katika upangaji wa bajeti za wizara ya  afya.

“Napenda kutoa wito kwa wataalam wa sekta ya afya kuendelea kutoa elimu kwa wananchi kuhusu umuhimu wa kupima afya zao kwa manufaa ya mtu mmoja mmoja na hatimaye taifa kwa ujumla wake” alisema Mabiti.

Baadhi ya wananchi wakishiriki katika zoezi la upimaji afya lililofanyika leo tarehe 26.09.2018 katika kijiji cha Sanya Juu.

Akiongea na wananchi na watumishi wa Umma walioshiriki katika kampeni ya uzinduzi wa zoezi la upimaji wa afya bure kwa wananchi mhe. Joseph Mabiti alisema kuwa, kauli mbiu ya kampeni ya upimaji wa afya mwaka 2018 ni “PIMA, JITAMBUE , ISHI”.

Katika siku ya kwanza ya uzinduzi wa kampeni hiyo ya upimaji iliyozinduliwa kata ya Sanya Juu,watu 244 wamejitokeza na kupima afya zao na kupatiwa ushauri na wataalam wa afya.

Zoezi la upimaji afya litaendelea Wilaya ya Siha hadi mwishoni mwa mwezi Novemba, 2018 na litafanyika katika vituo vyote vya afya , Zahanati zote pamoja na maeneo ya kutolea huduma yenye mkusanyiko mkubwa wa watu kama vile shule.