KAMATI YA USALAMA SIHA YAPONGEZA UJENZI KITUO CHA AFYA LAWATE

Posted on: August 21st, 2025

Mkuu wa Wilaya ya Siha Mhe. Dkt Christopher Timbuka amepongeza ubora na ufanisi wa mradi wa ujenzi wa Kituo cha Afya Lawate unaotekelezwa kijiji cha Lawate Kata ya Kirua kwa fedha Shilingi Milioni 681.54 kutoka Serikali Kuu.

Mradi huo unajumuisha ujenzi wa miundombinu muhimu inayohitajika kutoa huduma za afya bora ikiwa ni pamoja na jengo la upasuaji, jengo la wodi ya wazazi, jengo la maabara, jengo la kufulia, jengo la wagonjwa wa nje (OPD), Uwekaji wa maji safi, choo cha nje,  mfumo wa maji taka, shimo la kondo la nyuma (placenta pit), kichomea taka na shimo la majivu (Ash Pit)

Akizungumza baada ya kukagua mradi huo leo Agosti 21, 2025 wakati wa ziara ya Kamati ya Usalama Wilaya ya Siha amesema ushirkiano uliopo kati ya viongozi wa kata ya Kirua na Kijiji cha Lawate, wananchi, kamati ya usimamizi wa mradi na ofisi ya Mkurugenzi Mtendaji wa Halmashauri ya Wilaya ya Siha umechagiza kwa kiasi kikubwa kutekelezwa kwa ubora na ufanisi.

Amesema kukamilika kwa mradi huo kwa wakati na kwa ubora unaotakiwa utawawezesha wananchi kupata huduma za afya karibu na kuwapunguzia umbali wanaotembea kufuata huduma za afya katika Hospitali ya Wilaya ya Siha.