Jamii yashauriwa kusimamia Malezi ya Mtoto: DC SIHA

Posted on: February 29th, 2024

DKT TIMBUKA AZINDUA PROGRAMU JUMUISHI YA KITAIFA YA MALEZI, MAKUZI NA MAENDELEO YA AWALI YA MTOTO WILAYA YA SIHA

Mkuu wa Wilaya ya Siha Mhe. Dkt. Christopher Timbuka amewataka wadau wa makuzi na maendeleo ya awali ya mtoto kufanya kazi kwa kushirikiana kwa ukaribu ili  kutekeleza Programu Jumuishi ya Malezi, Makuzi na Maendeleo ya Awali ya Mtoto ili kuharakisha upatikanaji wa matokeo chanya kwa  mtoto.

Mhe Dkt Timbuka amesema hayo Februari 29, 2024 wakati wa uzinduzi wa Programu Jumuishi ya kitaifa ya malezi, makuzi na maendeleo ya awali ya mtoto Wilaya ya Siha yaliyofanyika katika ukumbi wa mikutano wa makao ya Halmashauri.

Amesema ili kufikia malengo na kuifanya Wilaya ya Siha kuwa ya mfano wakati wa utekelezaji wa programu hiyo ushirikiano baina ya Serikali na wadau wengine katika sekta binafsi unahitajika.

“Niwakumbushe tu kwamba kila mtu kuanzia ngazi ya familia anawajibu mkubwa sana katika kuhakikisha tunakuwa na matokeo chanya na ya haraka kupitia programu jumuishi ya kitaifa ya malezi, makuzi na maendeleo ya awali ya mtoto, ikiwa wazazi au walezi, wataalamu wa afya, lishe, maafisa ustawi wa jamii, maendeleo ya jamii na walimu watasimamia kikamilifu malezi ya watoto”  amesema mhe. Dkt. Christopher timbuka.

“Kupitia vituo vya malezi ya watoto wadogo mchana (Daycare Centers) na makao ya watoto yatima na watoto wanaoishi katika mazingira magumu kwa kuajili watoa huduma wenye sifa, kuzingatia kanuni za usafi, upatikanaji wa maji safi na salama, lishe bora, ulinzi na usalama, usimamizi wa afya za watoto vituoni na usajili wa vituo katika mamlaka husika kutasaidia watoto wote wataishi na kustawi” ameongeza Dkt Timbuka.