Wananchi Siha kunufaika mpango uboreshaji afya ya jamii

Posted on: November 15th, 2018

Mpango  uboreshaji afya ya Jamii kuanza rasmi Siha Des,2018

Halmashauri ya Wilaya ya Siha Mkoa wa Kilimanjaro leo tarehe 15.11.2018 imeweka makubaliano ya ushirikiano wa kuboresha mpango wa afya ya jamii kwa kipindi cha mwaka mmoja kuanzia mwezi Desemba, 2018 hadi Desemba 2019.

Makubaliano ya ushirikiano wa kuboresha sekta ya afya  ya jamii yamefikiwa kati ya  Halmashauri ya Wilaya ya Siha na shirika lisilo la Kiserikali kwa jina Ubora Tanzania ambalo litatoa misaada mbalimbali kupitia chuo cha Tiba More House kutoka nchini Marekani.

Ushirikiano huo umetokana na juhudi kubwa zinazoendelea kufanywa na Mkurugenzi Mtendaji wa Halmashauri ya Wilaya ya Siha ndugu Valerian Juwal ambaye ameamua kutafuta wahisani mbalimbali wa ndani na nje ya nchi kwa lengo la  kushirikiana na Serikali ya Tanzania ili kuboresha utoaji wa huduma za  sekta ya afya kwa jamii.

Mkurugenzi Mtendaji wa Halmashauri ya Halmashauri ya Wilaya ya Siha  ndugu Juwal ameeleza  kuwa kwa ushirikiano uliofanyika Halmashauri ya Siha itapata manufaa makubwa ikiwemo kupata misaada ya kuboresha miundombinu katika vituo vya afya  Wilaya ya Siha pamoja na Hospitali yetu  ya Wilaya.

Alieleza kuwa, katika afya ya jamii wananchi watapata huduma za uchunguzi wa kifua kikuu,uchunguzi wa ngozi,huduma ya mama na mtoto, pia upimaji bure wa saratani ya shingo ya kizazi kwa wanawake na mabinti mashuleni.

Katika makubaliano hayo Siha itaweza kupata nafasi ya wataalam wake kupata mafunzo mbalimbali kutoka chuo cha Tiba More House kutoka Nchini Marekani ambapo wataalam hao watapatiwa elimu ya kuboresha afya kwa jamii ikiwemo elimu ya kuzuia maambukizi ya magonjwa mbalimbali,utaalam wa upasuaji na uboreshaji wa lishe bora kwa jamii.

Mkurugenzi Mtendaji Halmashauri ya Siha ndugu Valerian Juwal(wa tano kutoka kushoto) akiwa na wadau wa sekta ya afya walioshuhudia uwekaji wa makubaliano ya uboreshaji afya ya jamii Siha uliofanyika tarehe 15.11.2018

Kwa mujibu wa Mkurugenzi wa shirika hilo lisilo la kiserikali kupitia Ubora Tanzania ndugu Gerald Thames alisema kuwa mpango unatarajiwa kuanza mwishoni wa mwaka 2018 na utaanza kwa majaribio katika Kata mbili  zitazopendekezwa Wilayani Siha.

Katika mpango huu wanufaika wakubwa watakuwa wananchi wote wa Wilaya ya Siha,watumishi wa sekta ya afya pamoja na wataalam mbalimbali watakaokuja kutoka ndani na nje ya Tanzania.