ELIMU YA LISHE ITOLEWE KWENYE MAKUNDI YOTE - CHALAMILA

Posted on: January 6th, 2025

Wataalamu wa Lishe Wilaya ya Siha kwa kushirikiana na wahudumu ngazi ya jamii wametakiwa kuendelea kutoa elimu ya lishe katika makundi yote ya jamii wakiwemo wanaume na vijana ili washiriki kwa asilimia zote kuboresha afya ya jamii.

Wito huo umetolewa na Katibu Tawala Wilaya ya Siha Ndugu Jane Chalamila kwa niaba ya Mkuu wa Wilaya Mhe. Dkt Christopher Timbuka wakati wa kikao cha kupitia utekelezaji wa mpango wa bajeti ya lishe kwa mwaka wa fedha 2025/2026 katika ukumbi wa makao makuu ya Halmashauri leo Januari 06, 2024.

Katibu Tawala Chalamila amesema suala la lishe sio kwa ajili ya wanawake na watoto pekee bali ni kwa ajili ya makundi yote katika jamii wakiwemo wanaume na vijana, hivyo elimu iendelee kutolewa ili makundi yote yashiriki.

Amewahimiza wataalamu wa lishe kutumia nyumba za ibada na mikutano ya hadhara ngazi ya kata na vijiji kutoa elimu ili isaidie kupunguza au kumaliza kabisa hali ya udumavu na ukosefu wa lishe bora kwa watoto na jamii kwa ujumla.

Kwa upande wake, Mwenyekiti wa Halmashauri ya Wilaya ya Siha Mhe. Duncan Urassa amesema hali wa upatikanaji wa Lishe Bora kwa Wilaya ya Siha ni nzuri hivyo wananchi waelimishe matumizi sahihi ya lishe hiyo ili kuboresha afya zao.