DKT TIMBUKA AWASIHI WANANCHI KUWATUMIA VIONGOZI WA KATA NA VIJIJI WANAPOINGIA MAKUBALIANO

Posted on: March 18th, 2024

Mkuu wa Wilaya ya Siha Mhe Dkt Christopher Timbuka amewataka wananchi wa Kata ya Biriri na maeneo mengine ndani ya Wilaya kuwatumia Watendaji wa Kata na Vijiji, Polisi Kata na Viongozi wa kisiasa ndani ya kijiji wanapoingia makubaliano yoyote kwa kutoa taarifa ya maandishi na kuomba ushauri wa kitaalamu.

Akizunguza Katika kikao  na wananchi wa Kata hiyo cha kusikiliza kero na kuzitolea ufafanuzi na ufumbuzi kilichofanyika kwenye viwanja vya ofisi za kata hiyo leo Machi 18, 2024, Mhe Dkt Christopher Timbuka amesema watendaji waliopo katika maeneo yao wameajiriwa kwa lengo la kuwasikiliza na kuwahudumia wananchi katika maeneo yao kwa urahisi.

Amewaasa wananchi kuacha kuingia makubaliano bila maandishi na kuwashirikisha viongozi wa kata na vijiji likiwemo Jeshi la Polisi kupitia Polisi Kata kwani yamekuwa yakichangia kwa kiasi kikubwa uwepo wa migogoro katika jamii.

“Tuache kufanya mambo vichochoroni, ndio maana serikali imejenga hizi ofisi na kuajiri watumishi kwa ajili ya kuwahudumia wananchi, kwa hiyo kama mnaingia makubaliano huko mtaani bila maandishi baadae mkianza kunyanyasana, unaanza kulalamika hilo sio jambo jema sana” amesema Mhe Dkt Timbuka

“Kwa hiyo naomba sana tuzitumie hizi ofisi za Kata na Vijiji, Wenyeviti wa Vijiji na Vitongoji, Maafisa Elimu kata na Polisi Kata kwa sababu wameajiriwa na Serikali ili waje wafanye hizo kazi za wananchi, tusione shida kuwatumia” ameongeza Mhe Dkt Timbuka.