DKT TIMBUKA APIGA MARUFUKU UBAMBUZI KATIKA WILAYA YA SIHA

Posted on: March 22nd, 2024

Mkuu wa Wilaya ya Siha Mhe Dkt Christopher Timbuka amepiga marufuku zoezi la ubambuzi katika Wilaya kuanzia leo Machi 22, 2024 hadi utakapotengenezwa utaratibu mwingine mzuri zaidi na shirikishi wa wananchi kuchangia shughuli za maendeleo.

Mhe Dkt Timbuka ametoa marufuku hiyo leo Machi 22, 2024 wakati wa kikao cha maandalizi ya mapokezi ya Mwenge wa Uhuru kilichofanyika katika ukumbi wa makao makuu ya Halmashauri, ambapo amesema Kata au vijiji vitakavyobainika kuendesha zoezi la ubambuzi atawachukulia hatua za kisheria watendaji wa kata na vijiji husika.

Amesema kilichokuwa kinafanyika hivi karibuni ni uporaji wa mali za wananchi licha ya awali kuagiza zoezi hilo lifanyike kwa kufuata utaratibu, kanuni na sheria za nchi.

“Tunapenda maendeleo yafanyike kwenye Wilaya na wananchi washiriki kuchangia kidogo katika shughuli za maendeleo lakini utaratibu unaofanyika wa ubambuzi sio rafiki kwa hiyo nikisikia lolote kuanzia leo na watendaji mpo hapa, nitawachukulia hatua kwamba mmekiuka maagizo” amesema Dkt Timbuka.

“Hatutaruhusu tena zoezi la ubambuzi mpaka pale utaratibu mzuri na shirikishi utakapoandaliwa, tusifanye tena kuanzia leo machi 22, 2024” ameongeza dkt timbuka.

Mkuu wa Wilaya ya Siha Mhe Dkt Christopher Timbuka (kulia) akiteta jambo na Dkt Haji M. Mnasi, Mkurugenzi Mtendaji wa Halmashauri ya Wilaya ya Siha wakati wa kikao cha maandalizi ya mapokezi ya Mwenge wa Uhuru kilichofanyika leo Machi 22, 2024 katika ukumbi wa mikutano wa makao makuu ya Halmashauri.

Mwenge wa Uhuru katika Wilaya ya Siha utapokelewa katika Kata ya Ormelili Aprili 04, 2024 ukitokea Kata jirani ya Hai na kukimbizwa katika maeneo mbalimbali ya wilaya, na Aprili 05, 2024 utakabidhiwa katika Wilaya ya Rombo.

Wajumbe mbalimbali wa kikao cha maandalizi ya mapokezi ya mwenge wa uhuru kilichofanyika leo Machi 22, 2024 katika ukumbi wa mikutano wa makao makuu ya Halmashauri.