DKT CHAOTE APONGEZA UTENDAJI KAZI WA WAHUDUMU WA AFYA SIHA

Posted on: November 5th, 2024

Mkurugenzi Msaidizi wa Huduma za Afya, Ustawi wa Jamii na Lishe Ofisi ya Rais, TAMISEMI Dkt Paul Chaote leo Novemba 05, 2024 amewatembelea na kuzungumza na wagonjwa wa kisukari na presha zaidi ya 105 katika Kata ya Livishi waliojiunga kwenye vikundi kwa lengo la kurahisisha na kuboresha mahudhurio ya kliniki kila mwezi na utoaji wa elimu.

Vikundi hivyo vya wagonjwa wa Kisukari na Presha (Blood Pressure and Diabetes) yameanzishwa na Serikali ya Wilaya ya Siha kwa kushirikiana na Taasisi isiyo ya serikali ya Pharm Access ili lengo la kutatua changamoto ya mahudhurio madogo ya kliniki kwa wagonjwa hao.

Kutokana na uwepo wa vikundi hivyo kwa sasa huduma za kliniki kwa wagonjwa zinatolewa katika eneo la karibu linalowawezesha kupunguza gharama za kusafiri umbali mrefu nkufuata huduma, kuokoa muda na kuondoa vikwazo vya kuhudhuria kliniki.

Pia kupitia vikundi hivyo elimu ya kukabiliana na magonjwa yasiyoambukiza na uboreshaji wa mitindo ya maisha inayotolewa na wahudumu wa afya wa Wilaya ya Siha kwa kushirikiana na Taasisi isiyo ya Kiserikali ya Pharm Access inafikia kundi kubwa la walengwa kwa wakati mmoja hali inayosaidia kupunguza athari zaidi za magonjwa hayo.