DIWANI WA KATA YA ORMELILI AMPONGEZA DKT MOLLEL

Posted on: April 27th, 2024

Diwani wa Kata ya Ormelili na Makamu Mwenyekiti wa Halmashauri ya Wilaya ya Siha Mhe Noel Mollel amemshukuru Naibu Waziri wa Afya na Mbunge wa Jimbo la Siha Mhe Dkt Godwin Mollel kwa kuipambania Wilaya ya Siha ili ipate maendeleo katika sekta ya elimu, afya, maji, Umeme na miundombinu ya barabara.

Akitoa taarifa kwa wananchi wa kata ya Ormelili kuhusu fedha zilizotolewa na serikali kwa ajili ya miradi ya maendeleo wakati wa hafla ya kuiombea shule ya sekondari Ormelili leo Aprili 27, 2024, Mhe Noel Mollel amesema katika Kata ya Ormelili Mbunge amefanikisha kupatikana kwa fedha shilingi milioni 584.2 kwa ajili ya ujenzi wa shule mpya ya sekondari na shilingi milioni 128 kwa ajili ya ujenzi wa bweni la wanafunzi wenye mahitaji maalum katika shule ya msingi Ormelili.

Amesema Naibu waziri wa afya na Mbunge wa Jimbo la Siha amewezesha kukamilika kwa zahanati ya Sinai ambayo inatoa huduma za afya kwa wananchi wakati wote hali inayosaidia kupunguza vifo vya mama na mtoto.

"Sisi wananchi wa Kata ya Ormelili hatuhitaji maneno, tunataka kuona kazi zikifanyika za kutatua kero za wananchi, na Mbunge wetu amekuwa akituonesha kwa vitendo kwamba sio mtu wa maneno fedha zimeletwa na sisi wasaidizi wao ngazi ya chini hatutawaangusha kwenye kusimamia fedha hizo zifanye kazi iliyokusudiwa na thamani yake ionekane" ameongeza Mhe Noel Mollel.