DCC SIHA YAPONGEZA MAENDELEO MAKUBWA YA WILAYA YA SIHA

Posted on: January 25th, 2024

Wakulima Wilaya ya Siha watakiwa kuzingatia Kilimo Bora

Mkuu wa Wilaya ya Siha Mhe. Dkt Christopher Timbuka amewaonya baadhi ya  wakulima wanaokausha mazao kwa kutumia sumu hasa maharage kuacha mara moja tabia hiyo kwani inahatarisha afya za Wananchi na Wakazi wa Wilaya ya Siha.

Mhe. Dkt Timbuka amesema hayo  Januari 25, 2024 kwenye Kikao Maalum cha Kamati ya Ushauri wa Maendeleo ya Wilaya ya Siha kilichokutana kwa lengo la kujadili mpango na Bajeti ya Wilaya ya Siha kwa Mwaka wa Fedha 2024/2025.

Kikao cha Kamati ya Ushauri wa Maendeleo Wilaya ya Siha  kimefanyika katika Ukumbi wa Mikutano wa Makao Makuu ya Halmashauri ya Wilaya ya Siha na kuhudhuriwa na wadau mbalimbali wa maendeleo wakiwemo vyama vya siasa,viongozi wa dini,wafanyabiashara,Taasisi za Serikali,Wakuu wa Divisheni na Vitengo,Watendaji wa Kata na Maofisa Tarafa.

Amesema nimepata taarifa kuwa wapo baadhi ya wakulima wanatumia sumu za kukausha majani na kupiga mashambani kwa lengo la kukausha magugu huku mazao yakiwa shambani jambo ambalo linaweza kuhatarisha afya za watu.

 “Tusitumie sumu kukausha mazao kwa tamaa za kupata fedha za haraka wakati tunaumiza afya za walaji wa bidhaa hizo tunazowauzia, naomba tuwasisitize wakulima kuacha mara moja” amesema Mhe. Dkt Timbuka

Akizungumzia suala la uboreshaji wa wa bajeti, Mkuu wa Wilaya ya Siha Mhe. Dkt Christopher Timbuka amewashukuru wajumbe wa Kamati ya Ushauri ya Maendeleo ya Wilaya ya Siha (DCC) kwa mchango na ushauri wenye weledi na uwazi kwenye Mpango na Bajeti ya Mwaka wa Fedha 2024/2025.

Amesema Mpango na Bajeti iliyojadiliwa itaiwezesha Wilaya kutekeleza wajibu na majukumu yake kwa ukamilifu na michango iliyotolewa na wajumbe wa kamati hiyo unalenga kuboresha utekelezaji na usimamizi wa miradi yote .

“Sasa kikubwa ambacho nawaomba Halmashauri, TARURA, RUWASA, TANESCO na Wadau wote  kuhakikisha kwamba hata hii bajeti tuliyonayo sasa ya mwaka wa fedha 2023/2024 tunaisimamia na kuitekeleza vizuri ili hata tunapopata Bajeti ya Mwaka ujao tusiwe na viporo vya mwaka huu wa fedha” Amesema Mhe. Dkt Timbuka.