DC DKT TIMBUKA AWAHIMIZA WANANCHI SIHA KUSIMAMIA HAKI ZA WATOTO

Posted on: June 16th, 2025

Mkuu wa Wilaya ya Siha Mhe. Dkt Christopher Timbuka amewahimiza wazazi/walezi kuhakikisha wanazisimamia na kutekeleza haki za watoto ili kuwawezesha kukua katika mazingira salama.

Mhe. Dkt Timbuka ametoa wito huo leo Juni 16, 2025 wakati wa maadhimisho ya Siku ya Mtoto wa Afrika Kiwilaya yaliyofanyika katika Kijiji cha Lekrimuni, Kata ya Karansi ambapo amesema ni wajibu wa wazazi/walezi na jamii kuhakikisha haki za mtoto zinasimamiwa na kutekelezwa.

Amesema haki mojawapo ya mtoto ni kuhakikisha mtoto anapata elimu na Serikali kwa kushirikiana na wananchi inahamasisha utoaji wa elimu na lishe bora mashuleni ili kuwatengenezea watoto mazingira bora ya kujisomea.

“Kwa hiyo naomba niwasihi sana, masuala ya ukatili, kutowapa watoto lishe bora, na kuwashirikisha ni muhimu sana tukayazingatia na kijadilianana watoto wetu” amesema Mkuu wa Wilaya ya Siha Dkt Timbuka.

Akitoa maelezo mafupi kuhusu maadhimisho ya Siku ya Mtoto wa Afrika, Mkuu wa Divisheni ya Maendeleo ya Jamii Marco Masue amewahimiza wananchi wa Wilaya ya Siha kuendelea kutafakari upatikanaji wa haki za watoto tangu zilipoanzishwa na sera ya Maendeleo ya Mtoto ya Mwaka 2008.

Amewasihi wazazi kuendeleza dhana ya mtoto wa mwenzako ni wako na kumchukulia mtoto kama mtu muhimu kwa ajili ya ustawi wa familia na jamii kwa ujumla.

Kaulimbiu ya maadhimisho ya siku ya mtoto wa afrika kwa mwaka 2025 inasema, “Haki za Mtoto: Tulipotoka, Tulipo, na Tuendako.