Chanjo ya Surua na Rubela kutolewa watoto chini ya miaka mitano

Posted on: February 9th, 2024

CHANJO ya Surua na Rubela kutolewa tarehe 15-18/2/2024

Mganga Mkuu wa Wilaya ya Siha Dkt Paschal Mbota kwa niaba ya Mkurugenzi Mtendaji amewaomba watendaji wa Kata na Vijiji katika Wilaya ya Siha kuwahamasisha wananchi kuwapeleka watoto wenye umri  chini ya miaka mitano kupata chanjo ya Surua na Rubela itakayotolewa kuanzia Februari 15 hadi 18.

Dkt Mbota amesema hayo Februari 08, 2024 wakati wa kikao kazi cha maandalizi ya mapokezi ya Mwenge wa Uhuru mwaka 2024 kilichofanyika katika ukumbi wa mikutano wa makao makuu ya Halmashauri ya Wilaya ya Siha.

 Ameeleza kuwa wananchi wanatakiwa na kushauriwa kuchukua tahadhari ya ugonjwa wa surua na Rubela kwa kuwapeleka watoto wote wakapate chanjo katika vituo vyote vya kutolea huduma za afya ili isaidie kuwakinga watoto wenye umri chini ya miaka mitano.

 Aidha,Dkt Mbota amesema Serikali ya awamu ya Sita imeweka mikakati ya kupambana zaidi ya magonjwa ya mlipuko na amewaomba watendaji wa Kata na Vijiji  kushirikiana na wananchi kutoa elimu na kufanya usafi katika maeneo yao ili kuepukana na magonjwa ya mlipuko kama vile  kipindupindu, Ugonjwa wa macho mekundu (Red Eyes) na magonjwa mengine.

 “Kuna baadhi ya mikoa imeripotiwa kupata magonjwa haya ya mlipuko hivyo niwaombe Watendaji wa Kata na Vijiji kushirikiana na wataalamu wa afya kutoa elimu hususani kwa wafanyabiashara wa vyakula kufanya kazi zao kwenye mazingira safi na salama kwani magonjwa haya yanasababishwa na uchafu” amesema Dkt Mbota

 “Nashauri tutumie sheria ndogo za vijiji kuhakikisha mazingira ya wanaofanya biashara ya vyakula na matunda yanakuwa safi lengo kubwa likiwa ni  kuepukana na magonjwa ya mlipuko ambayo yanaweza kuleta madhara kwa afya ya binadamu ” amesema Dkt Mbota.