Bilioni 55.5 Zatekeleza Miradi ya Maendeleo Wilaya ya Siha

Posted on: July 5th, 2024

Naibu Waziri wa Afya na Mbunge wa Jimbo la Siha Mhe Dkt Godwin Mollel amesema ndani ya miaka mitatu ya Rais Samia Suluhu Hassan, Wilaya ya Siha imetekeleza miradi yenye thamani ya shilingi Bilioni 55.5 katika sekta ya elimu, afya, Barabara na miradi mingine.

Mhe Dkt Mollel amesema hayo Julai 05, 2024 katika mkutano na wananchi wa Kata ya Nasai baada ya kukagua na kuzindua ujenzi wa vyumba vinne vya  Madarasa na Matundu Saba ya Vyoo vilivyojengwa kwa Shilingi Milioni 114.7 katika Shule ya Sekondari Sanya Juu ili kuboresha mazingira ya kujifunza na kufundishia kwa wanafunzi wa kidato cha tano na sita.

Amesema awali shule ya sekondari Sanya Juu ilijenga Mabweni Mawili, Vyumba Saba vya Madarasa na Matundu 14 ya vyoo kwa Shilingi Milioni 464.4 ili kuondoa msongamano wa wanafunzi darasani na kutatua changamoto ya wanafunzi kulala madarasani.

“Wanafunzi wa Kata ya Ormelili walikuwa wanatembea umbali wa kilomita 32 kila siku Kwenda Sikirari Sekondari kufuata elimu lakini Rais Samia Suluhu Hassan amewapatia Milioni 584.2 wamejenga shule mpya ya Sekondari na sasa wanafunzi hawatoacha shule kwa sababu ya umbali wa kupata elimu” amesema Mhe dkt mollel.

“Lakini pia Kata ya Mitimirefu wanafunzi walikuwa wakitembea umbali wa Kilomita 14 kwenda namwai sekondari kupata elimu wakipita polini kwenye wanyama wakali, baada ya kuifikisha changamoto hiyo kwa rais samia suluhu Hassan, tayari wamepokea shilingi milioni 584 ili wajenge shule mpya ya sekondari” ameongeza Mhe Dkt Mollel.

Katika hatua nyingine, Mhe Dkt Mollel amesema ili kutatua changamoto ya ukosefu wa maji katika Wilaya ya Siha, serikali imetoa Shilingi Bilioni 6 kupanua skimu ya maji ya Gararagua kwenda katika vijiji nane vya Mawasiliano, Leklumuni, Karansi, Kandashi, Makiwaru, Mkombozi, Olkolili na Ormelili.

Mhe Dkt Godwin Mollel amefanya ziara katika kata za Livish, Kirua, Nasai na Ivaeny ambapo ameweka jiwe la msingi ujenzi wa Zahanati katika Kijiji cha Mowonjamu ambayo imepokea shilingi milioni 50 ili kumalizia na milioni 100 kwa ajili ya vifaa tiba, amezindua Vyumba vya Madarasa na matundu ya vyoo Sanya Juu Sekondari na kuweka jiwe la msingi ujenzi wa Vyumba sita vya madarasa vyenye thamani ya Shilingi Milioni 150 na Bweni Moja linalojengwa kwa shilingi Milioni 130 katika shule ya Sekondari Fuka.

Naibu Waziri wa Afya na Mbunge wa Jimbo la Siha Mhe Dkt Godwin Mollel akizungumza na wananchi wa Kata ya Nasai baada ya kukagua na kuzindua ujenzi wa vyumba vinne vya  Madarasa na Matundu Saba ya Vyoo vilivyojengwa kwa Shilingi Milioni 114.7 katika Shule ya Sekondari Sanya Juu ili kuboresha mazingira ya kujifunza na kufundishia kwa wanafunzi wa kidato cha tano na sita.

Wananchi wa Kata ya Nasai wakimshangilia Naibu Waziri wa Afya na Mbunge wa Jimbo la Siha Mhe Dkt Godwin Mollel alipowasili kwenye eneo la Mkutano baada ya kukagua na kuzindua ujenzi wa vyumba vinne vya  Madarasa na Matundu Saba ya Vyoo vilivyojengwa kwa Shilingi Milioni 114.7 katika Shule ya Sekondari Sanya Juu ili kuboresha mazingira ya kujifunza na kufundishia kwa wanafunzi wa kidato cha tano na sita.