Bei ya Maji Wilayani Siha-Kilimanjaro yaendelea kushuka

Posted on: August 15th, 2022

Bei ya Maji Wilaya ya Siha Mkoani Kilimanjaro  yaendelea kushuka

Wananchi Wilayani Siha waendelea kunufaika na kushuka kwa bei ya maji iliyotolewa na Wizara ya Maji hivi karibuni.

Akitoa taarifa katika Mkutano wa Baraza la Wah. Madiwani wa Halmashauri ya Wilaya ya Siha Mkoa wa Kilimanjaro uliofanyika hivi karibuni, Meneja wa RUWASA Wilaya ya Siha Mhandisi Emmy George amesema kuwa Serikali ya Rais Samia Suluhu Hassan kupitia Wizara ya Maji imetoa bei elekezi ya Maji kwa matumizi ya Majumbani,katika Taasisi na maeneo ya Biashara na Viwanda.

Meneja wa RUWASA SIHA Mhandisi Emmy George akitoa taarifa ya bei mpya za maji katika Baraza la Madiwani H/W Siha

Ameeleza kuwa bei elekezi ya matumizi ya maji majumbani kwa uniti moja itakuwa shilingi 700 tu kwa idadi yoyote ya kipimo mtumiaji atakachotumia,ambapo ni tofauti na hapo awali ilikuwa zaidi ya shilingi 850 kwa uniti moja ya maji(hakuna tena progressive).

Meneja wa RUWASA SIHA amewaambia wajumbe wa Baraza la Madiwani Halmashauri ya Siha kuwa,bei elekezi ya Maji kwa matumizi ya Biashara na Viwandani pia itabadilika kutoka shilingi 1200 na kushuka hadi  shilingi 1000 kwa uniti moja na hakuna pia progressive katika eneo hili.

Wah. Madiwani Halmashauri ya Siha wakisiliza taarifa ya maji kutoka meneja wa RUWASA SIHA

Katika maeneo ya Taasisi( kama vile Mashule,Vituo vya Afya,Zahanati,Hospitali), Meneja wa RUWASA Wilaya ya Siha alisema kuwa bei mpya  elekezi  ya maji itakuwa shilingi 700 tu kwa uniti moja ambapo pia hakuna kuongezeka kwa bei kulingana na matumizi ya Taasisi.

Wajumbe wa Baraza la Madiwani Halmashauri ya Wilaya ya Siha wakiwa katika ukumbi wa mikutano wa Siha

Katika Taarifa yake Meneja wa RUWASA Wilaya ya Siha amesema kuwa bei hizi mpya za maji zitaanza kutumika katika mwaka huu mpya wa fedha 2022/2023 hivyo wananchi wategemee kupata unafuu mkubwa kutokana na bei hizi.

Wilaya ya Siha ni Miongoni mwa Halmashauri za Mkoa wa Kilimanjaro zilizopata mafanikio makubwa katika usambazaji wa maji katika maeneo ya vijiji vyote 60 ,Kata 17 na Tarafa 5 na upatikanaji wa maji umefikia zaidi ya asilimia 85 kwa mwaka 2021/2022.