BARAZA LA MADIWANI SIHA LAMPONGEZA DKT MOLLEL KWA KUTATUA CHANGAMOTO ZA WANANCHI

Posted on: February 13th, 2025

Baraza la Madiwani Halmashauri ya Wilaya ya Siha limempongeza Naibu Waziri wa Afya na Mbunge wa Jimbo la Siha Mhe. Dkt Mollel kwa kuwezesha kupatikana kwa fedha za utekelezaji wa miradi ya maendeleo inayotatua changamoto za wananchi kwenye Kata zote 17 za Wilaya ya Siha.

Pongezi hizo zimetolewa leo Februari 13, 2025 wakati wa uwasiliashaji wa taarifa za kata kwenye Mkutano wa kawaida wa Baraza la Kata uliofanyika kwenye ukumbi wa Mikutano wa Halmashauri.

Akiwasilisha taarifa ya Kata ya Gararagua, Diwani wa Kata hiyo Mhe. Zacharia Lukumay amesema Mhe. Dkt Godwin Mollel amewezesha kupatikana kwa fedha za kujenga vyumba vya madarasa na matundu ya vyoo, nyumba za walimu, zahanati na miradi ya maji safi na usafi wa mazingira vinavyowawezesha wananchi kupata huduma bora na salama kwenye maeneo yao.

Diwani wa Kata ya Kirua Mhe. Samuel Mmari amesema mradi wa kituo cha Afya unaotekelezwa katika kijiji cha Lawate kwa fedha kutoka Serikali Kuu Shilingi Milioni 681.5 ni matunda ya uwasilishaji na ufuatiliaji wa karibu wa changamoto za wananchi uliofanywa na Mhe. Dkt Godwin Mollel.

Kwa upande wake, Mwenyekiti wa Halmashauri ya Wilaya ya Siha Mhe. Duncan Urassa amewaomba waheshimiwa madiwani kuwaeleza wananchi kazi zinazofanywa na Mbunge wa Jimbo la Siha kwa kushirikiana na Madiwani kwenye Kata zote.