Baraza la Ardhi na Nyumba lafunguliwa rasmi Wilaya ya Siha

Posted on: August 17th, 2023

MKUU WA MKOA  AFUNGUA BARAZA LA ARDHI NA NYUMBA  WILAYA YA  SIHA

Mkuu wa Mkoa wa Kilimanjaro Mhe. Nurdin Babu amefungua Baraza la ardhi na nyumba  Wilaya ya Siha na kuwaapisha wajumbe wa baraza hilo.

Mhe. Babu amesema hayo agosti 16, 2023 katika hafla ya kuwaapisha wajumbe wanne na kuzindua baraza la ardhi na nyumba Wilaya ya Siha iliyofanyika katika ofisi ya mkuu wa Wilaya ya siha na kuongeza kuwa mabaraza ya ardhi ya kata na wilaya hayana viashiria vitakavyowafanya wananchi kuogopa/kuwa na hofu ya kupeleka mashauri ya ardhi na nyumba kwa ajili ya usuluhishi.

Amesema mkoa wa Kilimanjaro umebarikiwa kuwa na ardhi nzuri  yenye rutuba hivyo wananchi wanatakiwa kuitumia ardhi hiyo kwa ajili ya uzalishaji na kujiongezea kipato badala ya kugombana kila wakati kutokana na migogoro ya ardhi,ameongeza kuwa  uwepo wa mabaraza ya ardhi na nyumba yatasaidia kupunguza na kuondoa migogoro ya ardhi katika  Wilaya ya Siha na Mkoa wa Kilimanjaro kwa ujumla.

Naye mkuu wa Wilaya ya Siha Mhe. Dkt Christopher Timbuka amesema kuzinduliwa kwa baraza la ardhi na nyumba Wilaya ya Siha kutawarahisishia wananchi kupunguza  gharama ya ukupeleka kesi zao Mkoani  kwani awali walikuwa wakitumia gharama kubwa kufuata huduma hiyo Makao Makuu ya Mkoa yaliyopo Moshi hali iliyokuwa ikisababisha kushindwa kupata haki kutokana na gharama kuwa kubwa.

Amesema kufunguliwa kwa baraza hilo kutawasaidia viongozi wa Wilaya kufanya kazi nyingine za kuwaletea maendeleo wananchi wa Wilaya ya Siha badala ya kukaa maofisini kutatua kesi na migogoro ya ardhi.

“Wapo baadhi ya Wananchi walipoteza haki yao baada ya kushindwa kusafiri kwenda Moshi kutokana na gharama za kwenda hadi huko na ilikuwa kilio kikubwa katika Wilaya yetu ya Siha, Hivyo ujio wa baraza hili utaturahisishia sana kazi katika Wilaya ili sisi tufanye kazi nyingine ya kuwaletea wananchi maendeleo ” Alisema Dkt. Timbuka.

Kwa upande wake, msajili wa msaidizi wa mabaraza ya ardhi na nyumba  kanda ya Kaskazini Zena Mathias amewataka wajumbe wa baraza la ardhi Wilaya ya Siha walioapishwa na mkuu wa Mkoa wa Kilimanjaro Mhe. Nurdin Babu kuwa waadilifu na kutendea haki viapo vyao kwa kuwahudumia vema  wananchi wa Wilaya ya Siha.

Pia amewaomba wajumbe walioapishwa kujitoa kwenye mashauri yenye mgongano wa kimaslahi yanayowasilishwa katika baraza hilo ili kufanya kazi kwa weledi na kwa ufanisi kwa kufuata sheria na kanuni zinazowaongoza katika kutimiza majukumu yao.

“Wajumbe ambao mmeapishwa na Mheshimiwa Mkuu wa Mkoa wa Kilimanjaro mjue kwamba hii ni dhamana mmepewa kwa ajili ya kuwahudumia wananchi wa Wilaya ya Siha, kwa hiyo naomba sana  mtumie vizuri  dhamana mliyopewa  msije mkawaangusha wananchi wanaowategemea kupata haki katika mashauri watakayoleta katika baraza” Alisema Zena.